آذربائیجان کے ذرائع نے دعویٰ کیا ہے کہ قازقستان میں تباہ ہونے والے طیارے کو روسی فضائی دفاعی نظام نے نشانہ بنایا۔
آذربائیجان ائیرلائنز کا بدھ کے روز قازقستان میں گر کر تباہ ہونے والا طیارہ روسی فضائی دفاعی نظام کے ذریعے گرایا گیا۔
خبر رساں ادارے “رائٹرز” نے تحقیقات سے آگاہ آذربائیجان کے چار ذرائع کے حوالے سے یہ اطلاع ایک رپورٹ میں دی ہے۔
رپورٹ کے مطابق طیارے نے اس علاقے سے اپنا رُخ تبدیل کیا جہاں روسی دفاعی نظام نصب ہے جبکہ قازق حکام کا کہنا ہےکہ طیارہ حادثے کی تحقیقات ابھی کسی نتیجے پرنہیں پہنچ سکیں۔
رپورٹ میں کہا گیا ہے کہ آذربائیجان ائیر لائنز کی J2-8243 پرواز روس کے اس علاقے سے رخ موڑنے کے بعد قازقستان کے شہر اقتاؤ کے قریب حادثے کا شکار ہوئی جہاں ماسکو نے حالیہ مہینوں میں یوکرینی ڈرون حملوں کے خلاف فضائی دفاعی نظام استعمال کیا ہے۔
واضح رہے کہ بدھ کے روز یہ مسافر طیارہ آذربائیجان کے باکو سے اڑنے کے بعد اپنے طے شدہ راستے سے سینکڑوں میل بھٹکنے کے بعد روس کے جنوبی چیچنیا کے علاقے گروزنی تک چلا گیا تھا۔
اس کے بعد یہ طیارہ بحیرہ کیسپین کے مخالف کنارے پر گر کر تباہ ہو گیا جس میں 38 افراد ہلاک ہو گئے تاہم متعدد بچ گئے تھے۔
