انڈیا کے وزیرِ داخلہ امت شاہ کا کہنا ہے کہ آپریشن سندور پہلگام میں ہمارے معصوم بھائیوں کے وحشیانہ قتل کا جواب ہے۔
اپنے ایکس اکاؤنٹ پر جاری ایک بیان میں انڈیا کے وزیرِ داخلہ امت شاہ کہنا تھا کہ مودی حکومت انڈیا اور اس کے لوگوں پر کسی بھی قسم کے حملے کا جواب دینے کے لیے تیار ہے۔
ان کا مزید کہنا تھا کہ انڈیا دہشتگردی کو جڑ سے ختم کرنے کے لیے پرعزم ہے۔
انڈیا کے وزیر خارجہ جے ایس شنکر نے کہا ہے کہ دنیا کو دہشت گردی کے خلاف برداشت کا مظاہرہ نہیں کرنا چاہیے۔
ایکس پر اپنے پیغام میں جے ایس شنکر نے ایک تصویر بھی پوسٹ کی جس پر ’آپریشن سندور‘ کے الفاظ درج ہیں۔
اس تصویر کو ان خواتین کے حوالے کے طور پر دیکھا جا رہا ہے، جو پہلگام حملے میں اپنے شوہروں کی ہلاکت کے بعد بیوہ ہو گئی ہیں۔
انڈین حکومت کا دعویٰ ہے کہ اس نے ’آپریشن سندور‘ کے تحت پہلگام حملے کے بعد پاکستان اور اس کے زیرِ انتظام کشمیر میں دہشتگردوں کے ٹھکانوں کو نشانہ بنایا۔
دوسری جانب کشمیر کے لیفٹیننٹ گورنر منوج سنہا نے جموں و کشمیر کے سرحدی اضلاع میں پولیس، انتظامی اور ضلعی عہدیداروں اور ڈپٹی کمشنرز کے ساتھ صورتحال کا جائزہ لیا ہے۔
ایکس پر اپنی ٹویٹ میں انھوں نے کہا کہ ’میں صورتحال پر گہری نظر رکھے ہوئے ہوں اور حکومت کسی بھی صورتحال سے نمٹنے کے لیے پوری طرح تیار ہے۔‘
واضح رہے کہ منگل کی شب انڈیا کی جانب سے پاکستان کے مختلف مقامات پر میزائل داغے جانے کے واقعات کے بعد لائن آف کنٹرول پر دونوں افواج کی جانب سے شدید شیلنگ کی اطلاعات ہیں۔
پاکستان کی جانب سے کئی انڈین پوسٹوں کو نشانہ بنائے جانے کے دعوے کیے گئے جبکہ انڈیا کی جانب سے بھی اسی نوعیت کے دعوے سامنے آ رہے ہیں جن کی تصدیق ممکن نہیں ہو سکی۔
یاد رہے کہ 22 اپریل کو انڈیا کے زیرِ انتظام کشمیر کے سیاحتی مقام پہلگام میں حملے میں 26 افراد ہلاک ہو گئے تھے۔
