ایران پر اسرائیلی حملے میں دو فوجی ہلاک ہوگئے ہیں۔
ایران کی سرکاری نیوز ایجنسی ارنا نے رپورٹ کیا ہے کہ ہفتے کی صبح ہونے والے اسرائیلی حملوں میں دو ایرانی فوجی ہلاک ہوئے۔
ایران کا کہنا ہے کہ اس کے دفاعی نظام نے تہران، خوزستان اور ایلام صوبوں میں فوجی اہداف پر اسرائیلی حملوں کا کامیابی سے جواب دیا جب کہ کچھ مقامات پر “محدود نقصان” ہوا۔
ایک بیان میں کہا گیا ہے کہ “اسلامی جمہوریہ ایران کی فوج نے ملک کی سلامتی، عوام اور ایران کے مفادات کے تحفظ میں مجرم صیہونی حکومت کے میزائلوں کا مقابلہ کرتے ہوئے اپنے دو فائٹرز کو قربان کر دیا۔”
اسرائیل نے ایران پر ہفتے کی علی الصباح حملے کیے ہیں جس میں فوجی اہداف کو نشانہ بنانے کا دعویٰ کیا گیا ہے۔
دوسری جانب ایران کی فوجی تنصبیات پر اسرائیل کے حملے کے بعد اردن نے دعویٰ کیا ہے کہ اس کی فضائی حدود استعمال نہیں ہوئی۔
اردن کے سرکاری میڈیا نے مسلح فورس کے ایک ذریعہ کا حوالہ دیتے ہوئے کہا کہ خطے کے تنازع میں شامل کسی بھی فریق کو اردن کی فضائی حدود سے گزرنے کی اجازت نہیں دی گئی۔
مشرقِ وسطیٰ میں کشیدگی بڑھنے کا آغاز سات اکتوبر 2023 کے بعد سے ہوا ہے اور خطے میں اسرائیل اور ایران کے ایک دوسرے پر حملے کے ساتھ ساتھ اسرائیل اور ایران نواز لبنانی عسکری گروپ حزب اللہ کے درمیان بھی لڑائی جاری ہے۔
سات اکتوبر 2023 کو فلسطینی عسکری تنظیم حماس کے اسرائیل پر دہشت گرد حملے میں اسرائیلی حکام کے مطابق 1200 افراد ہلاک اور تقریباً 250 کو یرغمال بنا لیا گیا تھا۔ اس حملے کے جواب میں اسرائیل کی غزہ میں شروع کی کارروائیوں میں غزہ کے صحت حکام کے مطابق اب تک 42 ہزار سے زائد فلسطینی ہلاک ہو چکے ہیں۔
