امریکہ کی جانب سے فلسطین اور ایران کی حمایت کا الزام لگا کر ناپسندیدہ شخصیت قرار دیکر ملک سے نکالے گئے جنوبی افریقی سفیر کا وطن پہنچنے پر والہانہ استقبال کیا گیا۔
امریکہ میں تعینات سابق جنوبی افریقی سفیر ابراہیم رسول اپنی اہلیہ کے ہمراہ کیپ ٹاؤن ائیرپورٹ پر پہنچے تو عوام کی بڑی تعداد ان کے استقبال کے لیے موجود تھی۔
ابراہیم رسول نے اپنے استقبال کے لیے آنے والے عوام سے خطاب کرتے ہوئے کہا کہ ناپسندیدہ شخصیت قرار دینے کا مطلب آپ لوگوں کو بے عزت کرنا ہے لیکن جب آپ کو اس کے جواب میں عوام کی جانب سے ایسا والہانہ استقبال ملے تو میں ناپسندیدہ شخصیت قرار دینے کے بیج کو اپنے لیے فخر سمجھ کر پہنوں گا۔
ان کا کہنا تھا یہ ہماری خواہش نہیں تھی کہ ہم واپس آئیں لیکن ہم بغیر کسی افسوس کے واپس آئے ہیں، ہم امریکہ مخالف پالیسیوں کی وجہ سے واپس نہیں آئے بلکہ ہمیں اپنے مفادات امریکہ کی جھولی میں ڈالنے سے انکار کرنے پر بھیجا گیا ہے۔
یاد رہے کہ امریکہ کے صدر ڈونلڈ ٹرمپ نے گزشتہ ماہ ایک ایگزیکٹو آرڈر جاری کرتے ہوئے جنوبی افریقا کی تمام فنڈنگ بند کر دی تھی اور الزام عائد کیا تھا کہ جنوبی افریقا فلسطینی مزاحمتی تحریک حماس اور ایران کو سپورٹ کر رہا ہے اور سفید فام لوگوں کے خلاف پالیسیاں مرتب کر رہا ہے۔
جنوبی افریقا نے دسمبر 2023 میں انٹرنیشنل کرمنل کورٹ میں اسرائیل کے خلاف غزہ میں منظم نسل کشی کی درخواست دائر کی تھی جسے بعد میں 10 سے زیادہ ممالک نے اپنایا تھا۔
