امریکہ کا جنوبی سرحد پر مزید فوجی تعینات کرنے کا فیصلہ

امریکی فوج نے میکسیکو کے ساتھ ملحق امریکہ کی سرحد پر لگ بھگ تین ہزار مزید اہلکار تعینات کرنے کا اعلان کیا ہے۔

امریکہ کی فوج کی شمالی کمانڈ یا نارتھ کوم کا کہنا ہے کہ اس تعیناتی کے بعد میکسیکو کی سرحد پر ذمے داریاں ادا کرنے والے اہلکاروں کی تعداد نو ہزار کے لگ بھگ ہوجائے گی۔

نارتھ کوم نے اپنے بیان میں بتایا ہے کہ سرحد پر تعینات کیے جانے والے اہل کاروں میں سے 2400کا تعلق سیکنڈ اسٹرائیک بریگیڈ کومبیٹ ٹیم (سی بی سی ٹی) اور فورتھ انفینٹری ڈویژن سے ہوگا

نارتھ کوم کے مطابق لگ بھگ 500 اہل کار تھرڈ کومبیٹ ایوی ایشن بریگیڈ سے سرحد پر تعینات کیے جائیں گے۔

بیان میں بتایا ہے گیا ہے کہ یہ اہل کار سرحد پر نگرانی، انتظامی امور، نقل و حرکت، گاڑیوں کی مرمت و دیکھ بھال اور انجینئرنگ سپورٹ سمیت مختلف شعبوں میں مدد فراہم کریں گے۔

صدر ڈونلڈ ٹرمپ کی اولین ترجیحات میں بارڈر سیکیورٹی بھی شامل ہے اور انہوں نے اپنا عہدہ سنبھالنے کے پہلے ہی دن میکسیکو کے ساتھ ملحق امریکہ کی سرحد پر نیشنل ایمرجنسی لگانے کا اعلان کیا تھا۔