امریکی وزیر خارجہ مارکو روبیو نے جنوبی افریقہ میں ہونے والے گروپ آف 20 اجلاس میں شرکت سے انکار کر دیا ہے۔
امریکی وزیرخارجہ مارکو روبیو کا کہنا ہے کہ میں جوہانسبرگ میں ہونے والی جی 20 سمٹ میں شرکت نہیں کروں گا۔
انہوں نے کہا کہ میرا کام امریکی مفادات کو آگے بڑھانا ہے، امریکی ٹیکس کا پیسہ ضائع کرنا نہیں اور نہ ہی امریکی دشمنی کو بڑھانا ہے۔
روبیو نے بدھ کو کہا کہ جنوبی افریقہ خطرناک اقدامات کر رہا ہے۔ نجی زمینیں ضبط کی جا رہی ہیں۔ G20 کو ‘یکجہتی، مساوات، اور ماحولیات’ کے نام پر سیاسی ایجنڈے کے لیے استعمال کیا جا رہا ہے۔
یہ فیصلہ واشنگٹن اور پریٹوریا کے درمیان زمین کی متنازعہ ضبطی کے قانون پر تنازعے کے بعد سامنے آیا ہے۔
روبیو کا یہ اعلان اس وقت ہوا جب صدر ڈونلڈ ٹرمپ نے جنوبی افریقہ کو زمینی قانون کی منظوری پر امداد روکنے کی دھمکی دی تھی۔
پیر کو صدر ٹرمپ نے جنوبی افریقہ پر “زمینوں کی غیر منصفانہ ضبطی” اور “مخصوص طبقات کے ساتھ ناروا سلوک” کا الزام لگایا تھا۔
واضح رہے کہ جنوبی افریقہ 20 سے 21 فروری تک جوہانسبرگ میں جی 20 گروپ آف ممالک کے وزرائے خارجہ کے اجلاس کی میزبانی کر رہا ہے، جنوبی افریقہ کے پاس دسمبر 2024 سے نومبر 2025 تک جی 20 کی صدارت ہے۔
