پوپ فرانسس کے انتقال کے بعد رابرٹ فرانسس پریووسٹ کیتھولک مسیحیوں کے نئے پوپ منتخب کر لیے گئے ہیں۔
جمعرات کو ویٹیکن میں کالج آف کارڈینلز کے اجلاس کے دوسرے روز سسٹین چیپل (چرچ) کی چِمنی سے سفید دُھواں نکلتا ہوا دکھائی دیا۔
سفید دُھواں اس بات کی علامت ہوتا ہے کہ 133 کارڈینلز نے خفیہ رائے شماری کے ذریعے کیتھولک مسیحیوں کے نئے پوپ کا انتخاب کر لیا ہے۔
14 ستمبر 1955 کو پیدا ہونے والے 69 برس کے رابرٹ فرانسس کیتھولک مسیحیوں کے 267 ویں پوپ ہیں۔
رابرٹ فرانسس پہلے امریکی ہیں جو پوپ کے عہدے پر فائز ہوئے ہیں، ان کا تعلق ریاست ایلینوئس کے شہر شکاگو سے ہے۔
ان کارڈینلز نے ووٹنگ کے دوسرے روز پوپ فرانسس کے جانشین کو منتخب کیا، نئے پوپ کا انتخاب ہونے کے بعد سینٹ پیٹرز بیسیلیکا میں گھنٹیاں بجائی گئیں۔
نئے پوپ کے انتخاب کے موقعے پر سینٹ پیٹرز سکوائر میں ہزاروں افراد جمع تھے جنہوں نے چِمنی سے سفید دھواں نکلتے دیکھ کر خوشی کا اظہار کیا اور ایک دوسرے کو مبارک باد دی۔
رابرٹ فرانسس پوپ لیو XIV کے نام سے جانے جائیں گے۔
ان کے کیریئر کا بڑا حصہ جنوبی امریکہ کے ملک پیرو میں تبلیغی کاموں میں گزرا۔ انہوں نے 2014 سے 2023 تک چکلایو (پیرو) کے بشپ کے طور پر بھی ذمہ داریاں سرانجام دیں۔
پوپ فرانسس 88 برس کی عمر میں چل بسے تھے
ویٹیکن سٹی نے 21 اپریل کو ایک اعلامیے میں بتایا تھا کہ ’کیتھولک مسیحیوں کے پیشوا پوپ فرانسس 88 برس کی عمر میں انتقال کر گئے۔‘
ارجنٹائن سے تعلق رکھنے والے پوپ فرانسس طویل علالت کے بعد چند دن قبل ہی صحت یاب ہوئے تھے، انہیں نمونیا کی تشخیص ہوئی تھی۔
وہ شدید بیماری کے باعث 38 روز تک ہسپتال میں زیرِعلاج تھے۔ 23 مارچ کو صحت یاب ہونے کے بعد انہیں ہسپتال سے فارغ کیا گیا تھا۔
