مائکروسافٹ نے اپنی ایک رپورٹ میں انکشاف کیا ہے کہ ایران آن لائن اپنی سرگرمی میں اضافہ کر رہا ہے جس کا مقصد امریکی انتخابات کو نشانہ بنانا ہے
رپورٹ کے مطابق جون میں ایران کے پاسدارانِ انقلاب سے وابستہ ایک گروپ نے فشنگ ای میل کے ذریعے امریکی انتخابی مہم کے ایک عہدیدار کو ہدف بنانے کی کوشش کی گئی۔
مائیکروسافٹ کا کہنا ہے کہ گروپ نے ای میل کے جاری ہونے کے مقام کو خفیہ رکھنے کے لیے اسے ایک سابق سینئیر مشیر کے ہیک کیے گئے اکاؤنٹ سے بھیجا۔
مائیکروسافٹ نے بتایا ہے کہ سخت مقابلے والی ریاستوں میں ایرانی کارندوں نے جھوٹی خبریں گھڑنے، سرگرم کارکنوں کا روپ دھارنے، امریکی ووٹروں میں تفرقہ ڈالنے پر مہینوں صرف کیے ہیں۔
رپورٹ میں یہ بھی انکشاف کیا گیا ہے کہ روس اور چین بھی امریکہ میں سیاسی تقسیم کو انتخابات کے دوران تفرقے کے اپنے پیغامات کو آگے بڑھانے کے لیے استعمال کر رہے ہیں۔
مائیکروسافٹ کی رپورٹ میں ایران کی حالیہ کارروائی کی چار مثالیں بیان کی گئی ہیں جو کمپنی کو توقع ہے کہ نومبر کے الیکشن نزدیک آتے ہی بڑھ جائیں گی۔
مائیکروسافٹ کی رپورٹ کے مطابق ایرانی گروپ ایسی ویب سائٹس بناتا رہا جو امریکہ میں قائم نیوز سائٹس کی طرح ظاہر ہوتیں اور سیاسی منظر نامے کے حریف ووٹروں کو ہدف بناتی رہیں۔
رپورٹ کے مطابق ایک جعلی نیوز سائٹ جس کے مخاطب بائیں جانب جھکاؤ رکھنے والے ناظرین ہیں، ٹرمپ کی توہین کے لیے انہیں،” ہزیانی پاگل” لکھتی ہے اور بیان کرتی ہے کہ وہ منشیات استعمال کرتے ہیں۔
مائیکروسافٹ کی بیان کردہ ایک تیسری مثال میں ایرانی گروپ امریکی سرگرم کارکنوں کا روپ دھار کر ممکنہ طور پر الیکشن کے قریب ہونے والی کارروائیوں پر اثر انداز ہونے کے لیے بنیادی کام کر رہے ہیں۔
آخر میں رپورٹ کے مطابق مئی میں ایک ایرانی گروپ نے ایک سخت مقابلے والی ریاست میں ایک سرکاری ملازم کا اکاؤنٹ ہیک کر لیا۔ یہ واضح نہیں ہے کہ آیا یہ سائبر حملہ الیکشن میں مداخلت کی کوششوں سے متعلق تھا یا نہیں۔
