امریکہ کے وزیرِ خارجہ مارکو روبیو اسرائیل کا دورہ مکمل کرکے پیر کو سعودی عرب پہنچ گئے ہیں جہاں یوکرین تنازع پر اُن کی روسی حکام سے ملاقات متوقع ہے۔
یوکرین اور روس میں تقریباً تین سال سے جاری جنگ کے خاتمے کے لیے روسی حکام کے ساتھ متوقع مذاکرات سے قبل پیر کو امریکی وزیر خارجہ مارکو روبیو سعودی عرب پہنچے ہیں۔
سعودی عرب میں منگل کو امریکہ کے اعلیٰ حکام کی روس کے عہدے داروں سے ملاقات کا امکان ہے۔ اس ملاقات میں ممکنہ طور پر یوکرین جنگ کے خاتمے کے لیے بات چیت کا آغاز کیا جائے گا۔
امریکی وزیرِ خارجہ مارکو روبیو نے روس سے بات چیت کے آغاز پر یورپی ممالک کے خدشات کو رد کیا ہے۔
مارکو روبیو نے کہا کہ باقاعدہ طور پر بات چیت کا عمل شروع نہیں ہوا۔ اگر یہ عمل آگے بڑھتا ہے تو یوکرین اور یورپی ممالک کو اس میں شامل کیا جا سکتا ہے۔
مارکو روبیو نے مزید کہا کہ صدر ٹرمپ سے ٹیلی فون پر گفتگو میں روس کے صدر پوٹن نے قیامِ امن میں دلچسپی ظاہر کی ہے۔
روسی عہدے داروں سے ملاقات میں نیشنل سیکیورٹی ایڈوائزر مائیک والٹز اور وائٹ ہاؤس کے مشرقِ وسطیٰ کے لیے ایلچی اسٹیو وٹکوف بھی شامل ہوں گے۔
ابھی یہ واضح نہیں ہے کہ امریکہ کے ان اعلیٰ عہدے داروں کی سعودی عرب میں روس کے کن حکام سے ملاقاتیں ہوں گی
یہ پیش رفت صدر ڈونلڈ ٹرمپ کی جانب سے گذشتہ ہفتے روسی صدر ولادی میر پوتن سے ٹیلی فون پر بات چیت کے بعد سامنے آئی جس میں انہوں نے اعلیٰ حکام کو جنگ پر مذاکرات شروع کرنے کا حکم دیا۔
