انڈیا کے سیکریٹری خارجہ وکرم مسری نے بدھ کو دبئی میں طالبان کے قائم مقام وزیر خارجہ امیر خان متقی سے ملاقات کی۔
افغانستان کی وزارت خارجہ کے بیان میں کہا گیا ہے کہ کہ ملاقات میں افغانستان کے ساتھ تعلقات کو وسعت دینے اور ایران کی چابہار بندرگاہ کے ذریعے تجارت کو فروغ دینے پر بات چیت کی۔
افغان طالبان کے دفتر خارجہ نے کہا ہے کہ وہ انڈیا کو ایک ’اہم علاقائی اور معاشی شراکت دار‘ کے طور پر دیکھتے ہیں۔
افغان وزارت خارجہ سے جاری کیے گئے بیان میں کہا گیا کہ ’افغانستان کی متوازن اور معیشت پر مرکوز خارجہ پالیسی کے مطابق امارت اسلامیہ کا مقصد انڈیا کے ساتھ ایک اہم علاقائی اور اقتصادی شراکت دار کے طور پر سیاسی اور اقتصادی تعلقات کو مضبوط بنانا ہے۔‘
انڈیا کی وزارت خارجہ نے اجلاس کے بعد بیان میں کہا کہ انڈیا افغانستان میں ترقیاتی منصوبوں میں شامل ہونے اور تجارتی تعلقات کو فروغ دینے پر غور کر رہا ہے۔
واضح رہے کہ یہ اگست 2021 میں طالبان کے کابل کا کنٹرول سنبھالنے کے بعد انڈیا سے اعلٰی سطح پر پہلا سفارتی رابطہ ہے۔
انڈیا اُن متعدد ممالک میں سے ایک ہے جس کا کابل میں ایک چھوٹا سا سفارتی مشن تجارت، امداد اور طبی امداد کے لیے موجود ہے اور اس نے طالبان کے زیرِانتظام افغانستان میں انسانی امداد بھیجی ہے۔
