انڈیا میں برفانی تودہ گرنے سے ہلاکتوں کی تعداد آٹھ ہو گئی

انڈین فوج نے صفر درجہ حرارت میں ایک میراتھن آپریشن کے اختتام پر کہا ہے کہ امدادی کارکنوں نے شمالی انڈیا کے ایک دور دراز علاقے میں برفانی تودے کی جگہ سے آٹھویں اور آخری لاش برآمد کر لی ہے۔

ریاست اتراکھنڈ میں تبت کی سرحد پر منا گاؤں کے قریب جمعے کو برفانی تودہ گرنے سے 50 سے زائد مزدور برف اور ملبے تلے دب گئے تھے۔

حکام نے برفانی تودے کے وقت سائٹ پر موجود کارکنوں کی تعداد کو 55 سے کم کر کے اس وقت 54 کر دیا تھا جب ایک مزدور، جس کے بارے میں پہلے یہ خیال کیا جا رہا تھا کہ وہ (برف اور ملبے تلے) دبا ہوا ہے، برفانی تودے کی زد میں آنے سے پہلے بحفاظت گھر پہنچ گیا تھا۔

فوج نے سرچ آپریشنز میں مدد کے لیے ڈرون پر مبنی شناخت کے نظام کا استعمال کیا۔ متعدد ڈرونز اور ایک کھوجی کتے کا بھی استعمال کیا گیا۔

بارڈر روڈز آرگنائزیشن کے ایک منصوبے پر کام کرتے ہوئے یہ مزدور اسٹیل کے کنٹینرز میں رہ رہے تھے جو خیموں سے زیادہ مضبوط اور سخت موسم کو برداشت کرنے کی صلاحیت رکھتے تھے۔