انڈیا نے طاقتور لیزر ہتھیار کا کامیاب تجربہ کرنے کا دعویٰ کیا ہے۔
انڈین ڈیفنس ریسرچ اینڈ ڈویلپمنٹ آرگنائزیشن (DRDO) کے مطابق ریاست آندھرا پردیش کے علاقے کرنول میں ایک تجربے کے دوران زمین پر نصب لیزر ہتھیار سے فضا میں پرواز کرنے والے ڈرون کو تباہ کیا گیا۔
یہ لیزر ہتھیار “ایم کے ٹو” کہلاتا ہے اور اس میں 30 کلو واٹ کی لیزر استعمال کی گئی۔
تجربے میں 3.5 کلومیٹر کی بلندی پر موجود فکسڈ ونگ ڈرون کو نشانہ بنایا گیا۔ DRDO نے اس تجربے کی ویڈیو بھی جاری کی ہے جس میں ڈرون کو نشانہ بننے کے بعد زمین پر گرتے دیکھا جا سکتا ہے۔
ادارے کے مطابق، لیزر ڈائریکٹڈ انرجی ہتھیار ہیلی کاپٹرز، ڈرونز اور ریڈارز کو نشانہ بنانے کی صلاحیت رکھتے ہیں۔
ان کے مطابق اس کامیاب تجربے میں زمین پر موجود ایک ٹرک پر نصب لیزر ہتھیار کی مدد سے فضا میں پرواز کرنے والے ایک ڈرون کو طاقتور شعاعوں سے تباہ کر دیا گیا۔
DRDO نے اعلان کیا ہے کہ وہ اب اگلے مراحل پر کام کرے گا، جن میں ہائی انرجی مائیکرو ویو اور الیکٹرو میگنیٹک پلس ہتھیاروں کی تیاری شامل ہے۔
