منگل کی شب انڈیا کی جانب سے آپریشن سندور کے تحت پاکستان کے مختلف مقامات پر میزائل داغے جانے کے واقعات کے بعد لائن آف کنٹرول پر دونوں افواج کی جانب سے شدید شیلنگ کی اطلاعات ہیں۔
انڈیا کے زیرِ انتظام کشمیر کے علاقے مینڈھر اور پونچھ میں شیلنگ سے خاتون سمیت چھ افراد ہلاک ہو گئے ہیں۔
پونچھ کے چیف میڈیکل افسر ڈاکٹر پرویز احمد خان نے ہلاکتوں کی تصدیق کی ہے۔
انڈین فوج نے دعویٰ کیا کہ ’6 اور 7 مئی کی رات پاکستانی فوج نے لائن آف کنٹرول اور بین الاقوامی سرحد کے اُس پار، جموں و کشمیر کے سامنے بلا اشتعال فائرنگ اور توپ خانے سے گولہ باری کی۔‘
انڈین فوج کا دعویٰ ہے کہ ’اس فائرنگ اور گولہ باری کے نتیجے میں تین شہری ہلاک ہو گئے۔‘
پہلگام حملے کے بعد سے انڈیا اور پاکستان دونوں ایک دوسرے پر لائن آف کنٹرول کی خلاف ورزی اور شہری آبادیوں پر شیلنگ کے الزامات عائد کرتے رہے ہیں۔
