ایران میں پاک ایران سرحدی علاقے بمپشت سروان میں نامعلوم مسلح افراد نے نو پاکستانی شہریوں کو قتل کر دیا۔ جبکہ واقعہ میں تین افراد زخمی بھی ہوئے ہیں۔
واقعہ گذشتہ شب ایران کے سرحدی علاقے سیرکان میں پیش آیا۔
ایران میں قتل کیے گئے 5افراد کا تعلق جنوبی پنجاب کے علاقے علی پور سے ہے اور لواحقین کے مطابق شہید پاکستانی ایران میں مزدوری کا کام کرتے تھے۔
ایران میں پاکستانی سفیر مدثر ٹیپو نے سماجی رابطوں کی ویب سائٹ ایکس پر واقعے کی تصدیق کرتے ہوئے کہا کہ سراوان میں نو پاکستانیوں کے ہولناک قتل پر گہرا صدمہ ہے
پاکستانی سفیر نے ایران سے مطالبہ کیا کہ وہ پاکستانیوں کے قتل کے واقعے پر تحقیقات میں تعاون کرے۔
پاکستان کی ترجمان دفتر خارجہ ممتاز زہرا بلوچ نے بھی ایران سے واقعے کی فوری تحقیقات اور اس گھنانے جرم میں ملوث افراد کو گرفتار کرنے کا مطالبہ کیا ہے۔
واضح رہے کہ یہ واقعہ ایک ایسے موقع پر پیش آیا ہے کہ جب پاک ایران حالیہ کشیدگی میں کمی اور مفاہمت کے بعد گذشتہ روز ہی پاکستان اور ایران کے سفراء اسلام آباد اور تہران میں اپنے اپنے سفارت خانوں میں پہنچ گئے تھے۔
