گزشتہ پانچ سالوں میں بارہ ہزار سے زائد افغان شہری جعلی پاکستانی پاسپورٹ پر سعودی عرب جاتے ہوئے پکڑے گئے ہیں۔
پاکستانی سینیٹ کی قائمہ کمیٹی برائے داخلہ کو بتایا گیا کہ گزشتہ پانچ سالوں میں 12 ہزار سے زائد افغان شہری جعلی پاکستانی پاسپورٹ پر سعودی عرب جاتے ہوئے پکڑے گئے۔
ڈائریکٹر جنرل پاسپورٹ مصطفیٰ جمال قاضی نے اجلاس کو بتایا کہ 12 ہزار افراد جعلی پاکستانی پاسپورٹ پر سعودی عرب پہنچے۔
ان کا کہنا تھا کہ ان میں سے 3 ہزار کے پاس فوٹو سویپ پاسپورٹ تھے جب کہ 6 ہزار پاسپورٹ نیشنل ڈیٹا بیس اینڈ رجسٹریشن اتھارٹی (نادرا) کے ڈیٹا کے ساتھ چھیڑ چھاڑ کر کے جاری کیے گئے۔
قاضی نے کمیٹی کو بتایا، “ان جعلی دستاویزات پر سفر کرنے والے زیادہ تر افراد کو افغانستان ڈی پورٹ کر دیا گیا تھا۔ ان میں سے کوئی بھی اب پاکستان میں نہیں ہے۔”
ڈائریکٹر جنرل پاسپورٹ نے مزید کہا کہ جعلی پاسپورٹ کیس میں ملوث نادرا اور محکمہ پاسپورٹ کے متعدد اہلکاروں کے خلاف کارروائی کی گئی ہے۔
اس سوال پر کہ کیا کسی افسر پر کارروائی ہوئی یا صرف نچلے درجے کے اہلکاروں کو سزا دی گئی تو ڈی جی پاسپورٹ نے جواب دیا کہ کارروائی کا سامنا کرنے والوں میں 35 اسسٹنٹ ڈائریکٹرز بھی شامل ہیں۔
