برطانیہ کے وزیر اعظم سر کئیر اسٹارمر نے حکومتی پیشرفت کے تعین کیلئے چھ اہداف مقرر کر دیے۔
انتخابات میں کامیابی حاصل کرنے اور وزیراعظم کا عہدہ سنبھالنے کے 5 ماہ بعد کئیر اسٹارمر نے اپنی حکومت کیلئے واضح اہداف مقرر کیے ہیں جن سے متعلق وہ سمجھتے ہیں کہ ان اہداف کے معیار پر ووٹر ان کی حکومتی کارکردگی اور کامیابی کو پرکھ سکیں گے۔
وزیراعظم کئیر اسٹارمر کا کہنا تھا کہ وہ اپنے ووٹرز سے کیے گئے وعدوں کے تحت شہریوں کے معیار زندگی کو بہتر بنانے کیلئے اقدامات کا آغاز کر رہے ہیں۔
برطانوی وزیراعظم کی جانب سے اعلان کردہ اہداف کے تحت اگلے پانچ سالوں میں انگلینڈ میں 15 لاکھ نئے گھر تعمیر کیے جائیں گے اور کم از کم 150 بڑے اقتصادی منصوبوں کی تیزی سی اجازت دی جائے گی۔
وزیراعظم کا کہنا تھا کہ انگلینڈ میں نیشنل ہیلتھ سروس کے مریض علاج کیلئے 18 ہفتوں سے زیادہ انتظار نہیں کریں گے۔
وزیراعظم کے اہداف کے تحت شاہراہوں کو محفوظ بنانے کیلئے انگلینڈ اور ویلز میں 13 ہزار اضافی پولیس افسران، پی سی ایس اوز اور اسپیشل کانسٹیبل بھرتی کیے جائیں گے۔
وزیراعظم نے مائیگریشن کم کرنے کو اپنا فرض قرار دیا لیکن اس حوالے سے ہدف مقرر کرنے سے گریز کیا۔
رپورٹ کے مطابق اسٹارمر کی جانب سے اہداف کا تعین دراصل برطانیہ کے اگلے عام انتخابات تک ووٹرز کے حمایت برقرار رکھنے کیلئے ایک اقدام ہے تاہم اسٹارمر حکومت کے عہدیداروں نے ترقی کے اہداف کو اگلے الیکشن کی تیاری سے جوڑنے سے متعلق خبروں کو مسترد کردیا ہے۔
