برطانیہ میں دماغی صحت کے مریضوں کی ایک بڑی تعداد نے الزام لگایا ہے کہ ان کے علاج کے دوران نیشنل ہیلتھ سروس کے عملے کی طرف سے ان کی عصمت دری اور جنسی زیادتی کی گئی۔
اسکائی نیوز اور برطانوی اخبار دی انڈیپنڈنٹ کی مشترکہ تحقیقات میں بتا گیا ہے کہ انگلینڈ میں ذہنی صحت کے 30 سے زائد اداروں میں 2019 سے لے کر اب تک ملازمین اور مریضوں کی طرف سے جنسی حملوں اور ہراساں کیے جانے کی تقریباً 20,000 شکایات موصول ہوئی ہیں۔
تحقیقات میں یہ نتیجہ اخذ کیا گیا کہ این ایچ ایس ٹرسٹ زیادہ تر واقعات کو پولیس کو رپورٹ کرنے میں ناکام رہا، اور برطانیہ کے سب سے زیادہ کمزور مریضوں کو جنسی زیادتی سے بچانے کے لیے بنائے گئے معیارات پر پورا نہیں اترتا۔
18 ماہ کی تحقیقات میں کئی مریضوں اور ان کے اہل خانہ نے دماغی صحت کے مریضوں کے لیے مخصوص یونٹوں میں رہتے ہوئے جنسی زیادتی کا نشانہ بننے کی اپنی کئی کہانیاں بتائیں۔
ایک سوئمنگ اسٹار جس پر دو بار جنسی زیادتی کی گئی۔
تحقیقات کا آغاز سابق برطانوی سوئمنگ سٹار الیکسس کوئن کی گواہی سے ہوا، ان کا کہنا تھا کہ ان کے ساتھ دو مرتبہ جنسی زیادتی کی گئی، پہلی بار جب انہیں مردوں کے وارڈ میں سونے پر مجبور کیا گیا، اور دوسری مرتبہ مخلوط صنف کے وارڈ میں انہیں نشانہ بنایا گیا۔
اسی طرح ریوکا گرانٹ نے بھی گواہی دی اور کہا کہ این ایچ ایس کے عملے کے ایک رکن نے ان کے ساتھ جنسی زیادتی کی۔
روتھ سٹیفنی ٹوٹی، نے اپنی جوانی میں ریپ کا نشانہ بننے کے بعد ایسیکس شہر میں دماغی صحت کی خدمات حاصل کیں۔ انہوں نے بتایا کہ علاج کرانے کے بجائے، ایک ملازم نے انہیں 5 ماہ تک جنسی زیادتی کا نشانہ بنایا۔
