بنگلہ دیش کی عبوری حکومت کے سربراہ محمد یونس رواں ماہ چین کا دورہ کریں گے۔
نوبل امن انعام یافتہ محمد یونس نے گزشتہ سال اگست میں سابق وزیراعظم شیخ حسینہ کی معزولی کے بعد بنگلہ دیش کی عبوری حکومت کے سربراہ کا عہدہ سنبھالا تھا۔
محمد یونس کے میڈیا سیکریٹری شفیق العالم نے صحافیوں کو بتایا کہ دورے کا مقصد دو طرفہ تعلقات کو نئی بلندیوں تک پہنچانا ہے۔
انہوں نے کہا کہ ’دورے میں دونوں ممالک کے درمیان متعلق وسیع مسائل پر بات چیت ہوگی۔
محمد یونس 26 تا 29 مارچ کے تین روزہ دورے کے دوران چینی صدر شی جن پنگ سے بھی ملاقات کریں گے۔
محمد یونس پیکنگ یونیورسٹی سے ڈاکٹریٹ کی اعزازی ڈگری بھی حاصل کریں گے اور سرمایہ کاری کے مواقع تلاش کرنے کے لیے متعدد چینی فرموں کے سربراہوں سے ملاقاتیں کریں گے۔
شفیق العالم نے کہا کہ بنگلہ دیش مینوفیکچرنگ کا مرکز بننے کی خواہش رکھتا ہے اور اس کوشش میں چین کے ساتھ شراکت کا خواہشمند ہے۔
دورے میں بنگلہ دیش میں روہنگیا پناہ گزینوں کی آبادی پر بھی سفارتی بات چیت متوقع ہے، جن میں سے زیادہ تر 2017 میں پڑوسی ملک میانمار میں پرتشدد فوجی کریک ڈاؤن سے فرار ہو کر یہاں پہنچے تھے۔
چین نے ماضی میں بنگلہ دیش اور میانمار کے درمیان ثالث کے طور پر کام کیا ہے تاکہ روہنگیا اقلیت کی وطن واپسی کی راہ ہموار کی جا سکے۔
یہ کوششیں میانمار کی جانب سے روہنگیا کی واپسی پر رضامند نہ ہونے کی وجہ سے رک گئی تھیں۔
