سری لنکا اور جنوبی بھارت میں طاقت ور سمندری طوفان ’ فینگل’ کے نتیجے میں ہونے والی موسلادھار بارشوں اور سیلاب سے ہلاکتوں کی تعداد 20 ہوگئی۔
سمندری طوفان ہفتے کے روز تامل ناڈو سے ٹکرایا جس کے بعد پدوچیری میں گزشتہ 30 سالوں کے دوران ایک دن میں سب سے زیادہ بارش ریکارڈ کی گئی۔
گزشتہ ہفتے طوفان کے سری لنکا سے ٹکرانے کے بعد ہلاکتوں کی تعداد میں اضافہ رپورٹ ہوا تھا۔
سری لنکا کی ڈیزاسٹر مینجمنٹ ایجنسی کے مطابق طوفان سے مجموعی طور پر 17 افراد ہلاک ہوئے اور 4 لاکھ 7 ہزار شہری عارضی پناہ گاہوں میں منتقل ہونے پر مجبور ہوگئے۔
تامل ناڈو کے محکمہ برائے آفات کے وزیر ایس آر رامچندرن نے طوفان کے نتیجے میں کرنٹ لگنے سے 3 ہلاکتوں کی تصدیق کی ہے۔
طوفان کے بعد جنوبی بھارت کے کچھ حصوں میں سڑکیں زیر آب آگئی اور اسکول بند کر دیے گئے جبکہ موسمی حکام نے سیلاب کے خطرے کے برقرار رہنے کے حوالے سے خبردار کیا ہے۔
سائنس دانوں نے خبردار کیا ہے کہ ایندھن کے بڑھتے استعمال سے سامنے آنے والی موسمیاتی تبدیلی وں کی وجہ سے دنیا کے گرم ہونے (گلوبل وارمنگ) کے ساتھ ساتھ طوفان زیادہ طاقتور ہوتے جا رہے ہیں۔
