بھارتی ریاست اتراکھنڈ کے ضلع اُترکاشی میں بھاگیرتی ندی کے قریب ایک ہیلی کاپٹر حادثے کا شکار ہوگیا جس میں سوار 5 مسافر ہلاک جبکہ دو شدید زخمی ہو گئے۔
بھارتی خبر رساں ایجنسی اے این آئی کے مطابق ہیلی کاپٹر حادثے کے نتیجے میں شدید زخمی ہونے والے افراد کو قریبی اسپتال منتقل کر دیا گیا ہے جہاں ان کا علاج جاری ہے۔
حادثے کی جگہ سے موصول ہونے والی ویڈیوز میں ہیلی کاپٹر کا تباہ حال اندرونی حصہ دکھایا گیا ہے، جو ٹکرانے سے مکمل طور پر تباہ ہوگیا ہے۔
حادثے کی وجہ تاحال معلوم نہیں ہو سکی ہے اور حکام کی جانب سے تحقیقات جاری ہیں۔
رپورٹ کے مطابق اتراکھنڈ کے وزیر اعلیٰ پشکر سنگھ دھامی نے حادثے پر افسوس کا اظہار کرتے ہوئے کہا کہ ایس ڈی آر ایف اور ضلع انتظامیہ کی ٹیمیں فوری طور پر جائے وقوعہ پر پہنچ گئی ہیں تاکہ امدادی اور بچاؤ کے کام شروع کیے جا سکیں۔
انہوں نے کہا کہ انتظامیہ کو ہدایت دی گئی ہے کہ زخمیوں کو ہر ممکن مدد فراہم کی جائے اور حادثے کی مکمل تحقیقات کی جائیں۔
