بیلجیئم کے وزیر صحت کا کہنا ہے کہ ان کا ملک یکم جنوری سے ڈسپوزایبل الیکٹرانک سگریٹ کی فروخت پر پابندی عائد کر دے گا۔
وزیر صحت فرینک وینڈن بروک نے کہا ہے کہ سستے ای سگریٹ صحت کے لیے خطرہ بن چکے ہیں کیونکہ یہ نوجوانوں کو سگریٹ نوشی اور نکوٹین کی طرف راغب کرنے کا آسان طریقہ ہیں۔
انہوں نے ایک انٹرویو میں کہا کہ ڈسپوزایبل ای سگریٹ ایک نئی پراڈکٹ ہے جسے صرف نئے صارفین کو راغب کرنے کے لیے ڈیزائن کیا گیا ہے۔
وزیر صحت نے بتایا کہ ای سگریٹ میں اکثر نیکوٹیشن ہوتی ہے جو آپ کو نکوٹین کا عادی بناتی ہے۔ نکوٹین آپ کی صحت کے لیے نقصان دہ ہے۔ یہ حقیقت ہے۔
فرینک وینڈن بروک نے مزید کہا کہ چونکہ وہ ڈسپوزایبل ہیں پلاسٹک ، بیٹری اور سرکٹس ماحول پر بوجھ ہیں۔ اس سے بڑھ کر یہ کہ وہ خطرناک کیمیکل بناتے ہیں جو اُس وقت بھی موجود رہتا ہے جب لوگ انہیں پھینک دیتے ہیں۔
وزیر صحت نے کہا کہ انہوں نے ڈسپوزایبل ای سگریٹ کو اس لیے ٹارگٹ کیا ہے کیونکہ دوبارہ قابلِ استعمال سگریٹ لوگوں کو سگریٹ چھوڑنے میں مدد کرنے کا ایک ذریعہ بن سکتے ہیں اگر وہ کوئی دوسرا راستہ تلاش نہیں کرسکتے۔
رواں سال آسٹریلیا دنیا کا پہلا ملک بن گیا تھا جس نے میڈیکل اسٹورز کے علاوہ ای سگریٹس جنہیں ویپ بھی کہا جاتا ہے، کی فروخت پر پابندی عائد کی۔ اب بیلجیم اس پابندی میں یورپ کی قیادت کر رہا ہے۔
