تھائی لینڈ اور میانمار میں جمعے کو 7.7 شدت کا زلزلہ آیا جس کے نتیجے میں میانمار میں کم از کم 150 افراد ہلاک، جبکہ 700 سے زائد زخمی ہو گئے۔
بینکاک میں زیر تعمیر 30 منزلہ عمارت زمین بوس ہو گئی اور تاحال تین ہلاکتیں رپورٹ ہوئی ہیں۔
امریکی جیولوجیکل سروے کے مطابق زلزلے کی شدت 7.7 ریکارڈ کی گئی جبکہ اس کی گہرائی 10 کلومیٹر تھی۔
زلزلے کا مرکز میانمار کے شہر منڈالے سے 17.2 کلومیٹر کے فاصلے پر تھا، زلزلے کے بعد شدید آفٹر شاک بھی محسوس کیے گئے۔
حکام کے مطابق میانمار کے شہر ٹاؤنگو میں ایک مسجد کے جزوی طور پر منہدم ہونے سے کم از کم 3 افراد ہلاک ہوگئے۔آنگ بان میں ایک ہوٹل کے گرنے سے کم از کم 2 افراد ہلاک اور 20 زخمی ہوئے۔
زلزلے سے پانچ شہروں اور قصبوں میں عمارتیں منہدم ہوگئیں، جبکہ یانگون-منڈالے ایکسپریس وے پر دو پل بھی گرگئے۔
میانمار کی فوجی حکومت نے متاثرہ علاقوں میں ہنگامی حالت نافذ کر دی ہے۔
دوسری جانب تھائی لینڈ کے دارالاحکومت بینکاک کے گورنر کے مطابق زلزلے کے نتیجے میں تھائی لینڈ میں 3 افراد ہلاک ہوئے ہیں۔
تھائی نیشنل انسٹی ٹیوٹ آف ایمرجنسی میڈیسن کے مطابق بنکاک میں زیر تعمیر فلک بوس عمارت گرنے سے ایک شخص ہلاک ہوا جبکہ درجنوں مزدوروں کو ملبے سے نکال لیا گیا ہے۔
تھائی لینڈ کے نائب وزیر اعظم کے مطابق اب بھی 81 افراد ملبے تلے دبے ہوئے ہیں جنہیں نکالنے کے لیے ریسکیو آپریشن جاری ہے۔
حکام نے بنکاک کو آفت زدہ علاقہ قرار دے دیا ہے اور زلزلے کے مزید جھٹکوں کے خدشے کے باعث لوگوں کو محتاط رہنے کی ہدایت دی گئی ہے۔
