جنوبی کوریائی شہیر اینسیونگ میں زیر تعمیر ہائی وے پل کا ایک اونچا حصہ منہدم ہونے کے نتیجے میں وہاں موجود 4 مزدور ہلاک جبکہ 6 زخمی ہو گئے۔
فائر حکام نے بتایا کہ جنوبی کوریا میں منگل کو زیر تعمیر ہائی وے کا اونچا حصہ گرنے سے 4 افراد ہلاک اور 6 زخمی ہو گئے۔
نیشنل فائر ایجنسی کے مطابق دارالحکومت سیول سے تقریباً 65 کلومیٹر جنوب میں اینسیونگ شہر میں 10 افراد سائٹ پر کام کر رہے تھے۔
حادثہ صبح 9 بج کر 45 منٹ پر پیش آیا، جب ہائی وے پل کو سہارا دینے والے 50 میٹر اونچے اسٹیل کے 5 ڈھانچے گرنے سے مزدور ملبے میں دب گئے۔
زمین، انفراسٹرکچر اور ٹرانسپورٹ کی وزارت نے کہا کہ اس نے حکام کی ایک ٹیم کو جائے وقوعہ روانہ کردیا ہے، تاہم ہائی وے پل گرنے کی فوری طور پر کوئی وجہ معلوم نہیں ہو سکی ہے۔
ہائی وے پل کی مذکورہ سائٹ پر تعمیراتی کام کی ذمہ دار ہنڈائی انجینیئرنگ نے حادثے میں جانوں کے ضیاع اور مزدوروں کے زخمی ہونے پر معذرت کی ہے۔
منڈائی انجینیئرنگ نے ایک بیان میں کہا ہے کہ کمپنی فوری طور پر سائٹ کی بحالی اور حادثے کی صحیح وجہ جاننے کے لیے جامع تحقیقات کو یقینی بنانے کے لیے متعلقہ حکام کے ساتھ فعال طور پر تعاون کر رہی ہے۔
