خلیج تعاون کونسل کے سربراہ اجلاس میں غزہ میں اسرائیلی اقدامات کو عالمی قوانین اور عالمی انسانی قوانین کی کھلی خلاف ورزی قرار دیا گیا۔
دوحہ میں جی سی سی کی 44 ویں سربراہ کانفرنس کا انعقاد کیا گیا۔ جس میں دیگر سربراہان مملکت سمیت سعودی ولی عہد شہزادہ محمد بن سلمان اور ترک صدر رجب طیب اردوان نے بھی شرکت کی۔
کانفرنس کے آخر میں اعلامیہ بھی جاری کیا گیا جس میں کہا گیا کہ چھ ملکی کونسل کے اراکین نے اسرائیل کی غزہ میں جاری فوجی کارروائی کی مذمت کی ہے۔
اعلامیہ میں کہا گیا کہ صیہونی جارحیت سے ایک جانب شہری بے گھر ہوئے تو دوسری جانب انفرا اسٹرکچر بھی تباہ کردیا گیا ، رہائشی عمارتیں، اسکول، اسپتال اور عبادت گاہیں ملبے کا ڈھیر بن گئیں۔ غزہ کے رہائشیوں کے مسائل کو حل کیا جائے۔
اعلامیے میں غزہ میں فوری طور پر انسانی ہمدردی کی بنیادوں پر جنگ بندی کو بحال کرنے کا مطالبہ کیا گیا ہے۔
