یوکرین کی فوج نے دعوی کیا ہے کہ روس نے ایسٹر کے موقع پر اعلان کردہ 30 گھنٹے کی عارضی جنگ بندی کے خاتمے کے چند ہی گھنٹوں بعد یوکرین کے کئی علاقوں پر ڈرون حملے کیے۔
یوکرین کے صدر ولادیمیر زیلنسکی کے مطابق اس دوران روس نے 1 ہزار882 مرتبہ گولہ باری کی، جن میں 812 بار بھاری ہتھیار استعمال کیے گئے۔
زیلنسکی کے مطابق مشرقی یوکرین میں پوکرووسک شہر کے قریب شدید بمباری اور حملے ہوئے، جو ڈونیسک کے علاقے میں ایک اہم لاجسٹک مرکز ہے۔
یوکرینی فضائیہ کے مطابق کیف، خرسون، دنیپروپیٹرووسک، چرکاسی، میکولائیف اور زاپوریزیا سمیت کئی علاقوں میں فضائی حملے کے سائرن بجائے گئے۔
میکولائیف کے میئر الیگزینڈر سینکیوچ نے بتایا کہ “شہر میں دھماکوں کی آوازیں سنی گئیں”، تاہم فوری طور پر جانی نقصان کی اطلاع نہیں دی گئی۔
روسی فوج کی جانب سے ان حملوں پر تاحال کوئی بیان سامنے نہیں آیا۔
پیوٹن کے ترجمان دمتری پیسکوف نے جنگ بندی کے اختتام سے قبل تصدیق کی تھی کہ اسے توسیع دینے کا کوئی حکم جاری نہیں کیا گیا۔
روسی صدر ولادیمیر پیوٹن نے ایسٹر کے موقع پر ہفتہ کے روز جنگ بندی کا اعلان کیا تھا، جس کا آغاز ماسکو کے وقت کے مطابق شام 6 بجے ہوا اور اتوار کی رات 12 بجے اختتام پذیر ہوا۔
