سعودی عرب میں غیر قانونی تارکین کے خلاف کام کرنے والی مشترکہ کمیٹی نے ایک ہفتے کے دوران 25 ہزار غیر قانونی تارکین کو گرفتار کیا ہے۔
غیر قانونی تارکین کے خلاف کام کرنے والی مشترکہ کمیٹی کی جانب سے جاری بیان میں کہا گیا ہے کہ یہ گرفتاریاں 13 مارچ سے 19 مارچ 2025 کے درمیان ہوئی ہیں۔
گرفتار شدگان میں سے 17ہزار886 افراد کو اقامہ قوانین کی خلاف ورزی پر حراست میں لیا گیا۔
حکام کے مطابق 4ہزار 247 افراد پر سرحدی قوانین کی خلاف ورزی کا الزام تھا جبکہ 3ہزار 17 افراد لیبر قوانین کی خلاف ورزی میں ملوث تھے۔
بیان میں مزید کہا گیا کہ مذکورہ عرصے کے دوران 15سو 53 افراد گرفتار ہوئے ہیں جو سرحد عبور کرکے ملک میں غیر قانونی طور پر داخل ہونے کی کوشش کر رہے تھے جن میں سے 28 فیصد یمنی، 69 فیصد ایتھوپی جبکہ 3 فیصد دیگر ممالک کے تارکین تھے۔
اسی طرح سرحد عبور کرکے غیر قانونی طور پر ملک سے باہر جانے کی کوشش کرتے ہوئے 63 افراد گرفتار ہوئے ہیں۔
دوسری جانب وزارت داخلہ نے کہا ہے کہ غیر قانونی تارکین کو کسی بھی قسم کی سہولت فراہم کرنا سنگین جرم ہے جس پر 15 سال قید اور 10 لاکھ ریال جرمانہ ہوسکتا ہے۔
