بھارتی سپر اسٹار سلمان خان کےقتل کا ایک اور منصوبہ ناکام ہوگیا ہے
پولیس نے لارنس بشنوئی گینگ کے 4 ملزمان کو گرفتار کرلیا۔
پولیس کا کہنا ہےکہ ملزمان نے سلمان خان کی گاڑی پر حملہ کرنے کا منصوبہ بنایا تھا۔
گرفتار ملزمان نے سلمان خان کے فارم ہاؤس کے ساتھ ساتھ ممبئی کے علاقے باندرہ میں واقع ان کےگھر کی بھی ریکی کر رکھی تھی۔
بھارتی پولیس کے مطابق ملزمان نے سلمان خان کےگھر کے باہر فائرنگ کرنے والے دو شوٹروں کی 16 اپریل کو گرفتاری سے ایک ماہ قبل یہ منصوبہ بنایا تھا،جسے ناکام بنادیا گیا ہے۔
پولیس حکام کا کہنا ہے کہ سلمان خان پر حملے کے منصوبے کی تحقیقات جاری ہیں۔
خیال رہے کہ اپریل میں بھی سلمان خان کی رہائش گاہ کے باہر دو افراد نے فائرنگ کی تھی جنہیں دو روز بعد گرفتار کرلیا گیا تھا۔ دونوں ملزمان کو گجرات کے شہر بھوج سے گرفتار کیا گیا۔
واضح رہے کہ لارنس بشنوئی گینگ کی جانب سے دھمکیوں کے باعث سلمان خان کی 2022 سے سکیورٹی بڑھا دی گئی ہے اور اداکار سلمان خان کو ذاتی ہتھیار رکھنے کا لائسنس بھی دیا گیا ہے۔
