غزہ میں اسرائیلی بمباری سے پولیس چیف اور معاون ہلاک

جنوبی غزہ کے المواصی کیمپ پر اسرائیلی بمباری سے ہلاک فلسطینیوں کی تعداد 11 ہو گئی۔

المواصی کیمپ پر اسرائیلی بمباری سے غزہ پولیس چیف محمود صلاح اور ان کے معاون حسان مصطفیٰ بھی مارے گئے۔

اسرائیلی بمباری سے ہلاک ہونے والے محمود صلاح غزہ پولیس فورس کے ڈائریکٹر جنرل تھے۔

خیال رہے کہ چند روز قبل اسرائیلی فوج نے غزہ کی پٹی کے شمال میں واقع آخری فعال کمال عدوان اسپتال کو نشانہ بنایا اور اسپتال کے اہم حصوں کو آگ لگا کر جلا دیا جس کے باعث اسپتال غیر فعال ہو گیا ہے۔

اسرائیلی فورسز نے کمال عدوان اسپتال کے ڈائریکٹر حسام ابو صفیہ کو بھی حراست میں لیکر انہیں حراستی مرکز منتقل کر دیا ہے۔

اس حوالے سے اقوام متحدہ کا کہنا ہے کہ اسرائیل کی جانب سے غزہ میں اسپتالوں کو جان بوجھ کر نشانہ بنایا جا رہا ہے جو کہ نسل کشی کے زمرے میں آتا ہے۔

وزارت صحت نے بتایا کہ 14 ماہ سے زیادہ عرصے سے اسرائیل اور حماس کے درمیان جاری جنگ کے دوران مجموعی طور پر 45،514 فلسطینی ہلاک ہوچکے ہیں۔