غزہ کے اسپتالوں میں آگ اور خون کا کھیل نہیں دیکھنا چاہتے: امریکا

امریکی قومی سلامتی کے ترجمان جیک سلیوان نے کہا ہے کہ اسرائیل پر واضح کر دیا کہ ہم غزہ کے اسپتالوں میں آگ اور خون کا کھیل نہیں دیکھنا چاہتے۔

ٹی وی پروگرام میں اظہار خیال کرتے ہوئے امریکی قومی سلامتی کے ترجمان نے کہا کہ امریکا نے اسرائیلی افواج پر واضح کر دیا ہے کہ غزہ کے اسپتالوں کے اندر آتش گیر ہتھیاروں سے لڑائی سے گریز کیا جائے جس سے سویلینز کی زندگیوں کو خطرہ درپیش ہو۔

جیک سلیوان نے مزید کہا ہے کہ غزہ سے امریکی شہریوں کا انخلا جاری رکھا جائے گا تاہم شہریوں کے انخلا میں یہ مسئلہ درپیش ہے کہ رفاہ کراسنگ کبھی کھلتی ہے اور کبھی بند ہو جاتی ہے۔

انہوں نے کہا ہے کہ اسی طرح کبھی نکلنے والوں کی فہرست میں امریکیوں کے نام شامل ہوتے ہیں اور کبھی نہیں ہوتے تاہم جو بھی صورتحال ہو تمام امریکیوں کا انخلا یقینی بنایا جائے گا۔