اسرائیلی کابینہ حزب اللہ کے ساتھ جنگ بندی کی منظوری دینے کے لیے اجلاس آج ہوگا۔
وزیر اعظم بن یامین نیتن یاہو کے دفتر نے ان اطلاعات پر تبصرہ کرنے سے انکار کر دیا ہے کہ اسرائیل اور لبنان دونوں میں معاہدے کے متن پر اتفاق ہو گیا ہے۔
ایک سینئر اسرائیلی اہلکار نے بتایا کہ منگل کو کابینہ کے اجلاس کا مقصد معاہدے کے متن کی منظوری دینا ہے۔
اسرائیلی حکام نے اس سے قبل کہا تھا کہ جنگ کے خاتمے کے لیے معاہدہ قریب آرہا ہے اگرچہ کچھ مسائل باقی ہیں۔
فرانسیسی صدر کے دفتر نے کہا کہ جنگ بندی پر مذاکرات میں اہم پیش رفت ہوئی ہے۔
اس سے قبل عرب اخبار الشرق الاوسط نے رپورٹ دی تھی کہ بائیڈن اور میکراں منگل کو 60 روزہ جنگ بندی کا اعلان کریں گے۔
وائٹ ہاؤس نے کہا کہ لبنان-اسرائیل جنگ بندی پر ہونے والے مذاکرات مثبت رہے ہیں اور معاہدے کی طرف صحیح سمت میں جا رہے ہیں۔
قومی سلامتی کے ترجمان جان کربی نےعند یہ دیا کہ پیش رفت معاہدے کے قریب ہے۔
کربی نے کہا مذاکرات تعمیری تھے، اور ہمیں یقین ہے کہ اس کی رفتار بہت مثبت سمت میں جا رہی ہے۔
واضح رہے کہ امریکہ نے ایران کی حمایت یافتہ حزب اللہ عسکریت پسند تنظیم اور اسرائیل کے درمیان ایک سال سے جاری تنازع کے خاتمے کے لیے ایک معاہدے پر زور دیا ہے۔
اسرائیل اور حزب اللہ کے درمیان لڑائی غزہ میں فلسطینی گروپ حماس کے خلاف اسرائیل کی جنگ کے ساتھ شروع ہوئی۔ گزشتہ دو مہینوں میں اس لڑائی میں تیزی سے اضافہ ہوا۔
