نارتھ لندن میں گھر میں آتشزدگی سے ماں اور 3 بچوں سمیت 4 افراد ہلاک

نارتھ لندن کے علاقے برینٹ میں گھر میں آگ لگنے سے پاکستانی نژاد ماں اور تین بچے جان کی بازی ہار گئے۔

لندن میٹرو پولیٹن پولیس نے 41 سالہ متشبہ شخص کو حراست میں لے لیا ہے۔

حکام کا کہنا ہے کہ مرنے والے بچوں کی عمر 15، 8 اور 4 سال تھی، خاندان کے چار افراد کو زندہ بچا لیا گیا۔

برینٹ میں گھر میں آگ لگنے سے 4 افراد کی وفات کے بعد پولیس نے تحقیقات شروع کر دی، پولیس کے مطابق 24 مئی بروز ہفتہ 01:22 بجے ٹائلٹ کلوز، اسٹون برج میں لگنے والی آگ کی کال آئی۔

پولیس کے مطابق ایک 43 سالہ خاتون اور تین بچے، جن میں ایک 15 سالہ لڑکی، ایک 8 سالہ لڑکا، اور ایک 4 سالہ لڑکا شامل ہیں، جائے وقوعہ پر ہی دم توڑ گئے۔

 ذرائع کے مطابق متاثرہ خاندان کا تعلق آزاد کشمیر کے علاقے کوٹلی ( کھوئی رٹہ ) سے ہے۔