لیبیا کشتی حادثے میں 7 پاکستانیوں کی ہلاکت کی تصدیق

پاکستان کی فیڈرل انوسٹیگیشن ایجنسی نے لیبیا کشتی حادثے میں سات پاکستانی شہریوں کے ہلاک ہونے کی تصدیق کردی ہے۔

ایف آئی اے کے مطابق لیبیا کشتی حادثے میں ہلاک 16 افراد میں سے7 افراد پاکستانی تھے جن کی شناخت ان کے پاسپورٹ سے ہوئی۔

ایف آئی اے کا بتانا ہے کہ مرنے والے سات شہری خیبر پختونخوا کے رہائشی ہیں جن میں سے 6 کا تعلق کرم اور ایک کا باجوڑ سے ہے۔

واضح رہے کہ گزشتہ روز لیبیا میں پاکستانی سفارتخانے نے بتایا تھا کہ 65 ترکین وطن کو لے جانے والی کشتی مرسا ڈیلا کی بندرگاہ کے قریب الٹی گئی ہے۔

ابتدائی معلومات میں یہ بات سامنے آئی تھی کہ حادثے میں 16 پاکستانی ہلاک ہوئے تاہم گزشتہ روز صرف 10 افراد کی لاشیں نکالی گئی تھیں۔