یورپ کے انتہائی مطلوب منشیات کے اسمگلر اور اپنی ہی موت کا جھوٹا دعویٰ کرنے والے 32 سالہ مارکو ایبن کو میکسیکو میں قتل کر دیا گیا ہے۔
رپورٹ کے مطابق مارکو ایبن کا تعلق نیدر لینڈز سے تھا اور انہیں دارالحکومت میکسیکو سٹی سے 25 کلو میٹر کی دوری پر واقع ایتزپان زاراگوزہ کی میونسیپلٹی میں گولی مار کر قتل کیا گیا ہے۔
میکسیکو سٹی کے پراسیکیوٹر کے دفتر کے ایک عہدیدار نے منشیات کے اسمگلر مارکو ایبن کی موت کی تصدیق کی ہے۔
یورپ کی قانون نافذ کرنے والی ایجنسی یوروپال نے برازیل سے نیدرلینڈز منشیات اسمگل کرنے کے جرم میں مارکو ایبن کو یورپ کے ’انتہائی مطلوب مفروروں‘ کی فہرست میں شامل کیا ہوا تھا۔
معلومات کے مطابق مارکو ایبن کو اکتوبر 2020 میں سات سال سے زیادہ کی قید کی سزا سنائی گئی تھی۔
رپورٹ کے مطابق مارکو ایبن اور ان کے ساتھیوں نے سال 2014 سے 2015 کے درمیان مبینہ طور پر 400 کلو کی کوکین پائن ایپل کے ڈبوں میں بھر کر اسمگل کی تھی۔
گرفتاری سے بچنے کے لیے ڈرگ اسمگلر نے گزشتہ سال اکتوبر میں اپنی ہی موت کا ڈرامہ رچایا تھا۔
