امریکہ میں امیگریشن جج نے حکومت کو ایک دن کی مہلت دی ہے کہ وہ کولمبیا یونیورسٹی کے طالب علم محمود خلیل کو ملک بدر کرنے کے لیے ثبوت پیش کرے۔ عدالت کا کہنا ہے کہ وہ جمعے کو اس حوالے سے اپنا فیصلہ سنائے گی۔
اسسٹنٹ چیف امیگریشن جج جیمی کومنز نے جینا، لوزیانا میں لاسل امیگریشن کورٹ میں سماعت کے دوران کہا کہ ’اگر وہ ملک بدر کرنے کے قابل نہیں ہے تو میں جمعے کو اس کیس کو ختم کر دوں گا۔‘
سماعت کے دوران جج نے حکومت کے الزامات کو پڑھ کر سنایا جبکہ محمود خلیل کے اٹارنی وان ڈیر ہوٹ نے ہر الزام کی تردید کی۔
محکمۂ ہوم لینڈ سکیورٹی کے وکلاء نے جج جیمی کومنز کو بتایا کہ وہ بدھ کی شام 5 بجے تک ثبوت فراہم کر دیں گے۔
محمود خلیل کیس کی سماعت کے دوران کمرۂ عدالت میں موجود تھے اور وہ اپنی نشست سے اپنے اٹارنی مارک وان ڈیر ہوٹ کو سکرین پر دیکھ سکتے تھے جو کیلیفورنیا سے عدالتی کارروائی میں شامل تھے۔
کولمبیا یونیورسٹی کے طالب علم محمود خلیل کو ایک ماہ قبل نیویارک میں امیگریشن کے اہلکاروں نے 1,200 میل دور دیہی علاقے لوزیانا کے حراستی مرکز میں منتقل کر دیا تھا۔
صدر ڈونلڈ ٹرمپ کی انتظامیہ کا کہنا ہے کہ اس نے 1952 کے ایک قانون کے تحت محمود خلیل کی ملک بدری کا حکم دیا ہے۔
یہ قانون وزیر خارجہ کو کسی بھی ایسے شخص کی مستقل رہائش منسوخ کرنے کی اجازت دیتا ہے، جس کے بارے میں وہ فیصلہ کرتے ہیں کہ وہ امریکی خارجہ پالیسی کو نقصان پہنچا رہا ہے۔
امریکی حکومت کا یہ بھی کہنا ہے کہ فلسطین کے حامی محمود خلیل کو ملک سے اس لیے بھی بےدخل کر دینا چاہیے کیونکہ انہوں نے اپنی ویزا درخواست میں اس بات کو چُھپایا کہ انہوں نے اقوامِ متحدہ فلسطینی امدادی ایجنسی کے لیے کام کیا۔
