نیویارک میں ٹریفک کے مسئلے سے نمٹنے کیےلئے ٹول ٹیکس وصولی

امریکی شہر نیو یارک میں ٹریفک کے مسئلے سے نمٹنے کے لیے ملک کے پہلے ’کنجیشن پرائسنگ‘ منصوبے کا آغاز کردیا گیا۔

منصوبے کے مطابق مین ہیٹن کے مرکزی علاقے میں داخل ہونے والے ڈرائیور ٹول ادا کرنے کے پابند ہوں گے۔

اس منصوبے کے حامیوں کا کہنا ہے کہ یہ منصوبہ ٹریفک کے مسائل کو کم کرنے اور ان ڈرائیوروں سے فنڈ جمع کرنے کا ایک مؤثر طریقہ ہے جو ٹریفک مسائل میں اضافے کا سبب بنتے ہیں۔

رپورٹ کے مطابق اس پروگرام کے ذریعے 15 ارب ڈالر کے فنڈز جمع کیے جاسکیں گے۔

یہ منصوبہ اتوار کی نصف شب سے نافذ ہوا تاکہ کم ٹریفک والے دن کسی بھی تکنیکی مسئلے کو با آسانی حل کیا جا سکے۔

60 ویں اسٹریٹ سے مین ہیٹن بیٹری پارک تک کا علاقہ جہاں مشہور تھیٹر ڈسٹرکٹ، ٹائمز اسکوائر، ہیلز کچن، چیلسی اور سوہو شامل ہیں، اس زون میں شامل ہے جس میں داخلے کے لیے فیس ادا کرنی ہوگی۔

ڈرائیوروں کو عام دنوں میں صبح 5 بجے سے رات 9 بجے کے درمیان اور ویک اینڈز پر صبح 9 بجے سے رات 9 بجے کے دوران سب سے زیادہ فیس ادا کرنی ہوگی، ان اوقات کے بعد فیس 75 فیصد کم ہوگی تاکہ کم رش والے اوقات میں سفر کی حوصلہ افزائی کی جاسکے۔

مسافر گاڑیوں کو رش کے اوقات میں 9 ڈالراور کم رش کے اوقات میں 2025 ڈالر فیس دینی ہوگی، موٹرسائیکل سواروں کو رش کے اوقات میں 4.5 ڈالر اور دیگر اوقات میں 1.05 ادا کرنے ہوں گے، چھوٹے تجارتی ٹرکوں اور بعض بسوں کے لیے فیس 14.40 ڈالر اور بڑے ٹرکوں اور ٹور بسوں کے لیے فیس 21.60 ڈالر ہوگی جبکہ کم رش کے اوقات میں یہ فیس بالترتیب 3.60 ڈالراور 5.40 ڈالر تک ہوگی۔

معذور افراد کے زیر استعمال گاڑیوں اور ایمرجنسی سروسز کی گاڑیوں کو فیس کی ادائیگی سے استثنیٰ حاصل ہے۔

خیال رہے کہ نو منتخب امریکی صدر ڈونلڈ ٹرمپ اس منصوبے کے مخالف ہیں اور انہوں نے اشارہ دیا ہے کہ وہ صدارت سنبھالنے کے بعد اس منصوبے کو ختم کرنے کی کوشش کریں گے۔