روس اور یوکرین کے درمیان 175 جنگی قیدیوں کا تبادلہ ہوگیا۔
روس اور امریکی صدر کے درمیان ٹیلی فون پر رابطے کے بعد قیدیوں کے تبادلے کا اعلان ہوا جب کہ متحدہ عرب امارات نے روس اور یوکرین کے قیدیوں کے تبادلے میں ثالثی کردار ادا کیا۔
رپورٹ کے مطابق امریکی صدر ڈونلڈ ٹرمپ اور روسی صدر ولادی میر پیوٹن کے درمیان ٹیلی فون پر بات چیت کے بعد روس اور یوکرین نے 175 جنگی قیدیوں کا تبادلہ کیا۔
اس حوالے سے روسی وزارت دفاع نے قیدیوں کے تبادلے کی تصدیق کرتے ہوئے کہا کہ روس نے 22 زخمی یوکرینی فوجیوں کو بھی رہا کردیا ہے۔
روسی وزارت دفاع کا کہنا ہے کہ ان 22 افراد کو فوری طبی امداد کی ضرورت ہے اور انہیں خیر سگالی کے طور پر واپس بھیج دیا گیا ہے۔
یوکرین کے صدر ولادی میر زیلینسکی نے سماجی رابطے ک ویب سائٹ ’ایکس‘ پر ایک بیان میں اس تبادلے کو اپنی نوعیت کا سب سے بڑا واقعہ قرار دیا۔
انہوں نے قیدیوں کے تبادلے کی تصدیق کرتے ہوئے کہا کہ 22 یوکرینی جنگجو شدید زخمی تھے جن پر روس نے من گھڑت جرائم کے لیے ظلم کیا، رہائی کے بعد فوجیوں کو فوری طبی امداد فراہم کی جارہی ہے۔
روسی وزارت دفاع کی جانب سے جاری بیان میں کہا گیا کہ متحدہ عرب امارات نے اس معاہدے کو آسان بنانے کے لیے ثالث کا کردار ادا کیا۔
بیان میں کہا گیا ہے کہ معاہدے میں رہا ہونے والے روسی فوجی بیلاروس میں تھے اور مزید علاج کے لیے روس منتقل کرنے سے قبل ان کی طبی اور نفسیاتی جانچ کی جارہی ہے۔
