امریکی صدر ڈونلڈ ٹرمپ نے خلیج میکسیکو کو خلیج امریکہ قرار دینے کے اعلامیہ پر دستخط کر دیئے ہیں۔
ٹرمپ کے دستخط کے بعد خلیج میکسیکو کو باضابطہ طورپر خلیج امریکہ کا نام دے دیا گیا ہے۔
صدر ٹرمپ نے یہ اقدام سُپر بال دیکھنے کے لیے دوران پرواز کیا جس کے بعد امریکی صدر کے جہاز میں بھی اعلان کردیا گیا کہ آج ہم پہلی بار خلیج امریکہ پر پرواز کررہے ہیں۔ جس پر ٹرمپ نے برجستہ کہا کہ یہ بہت اچھا کام ہوا ہے۔
صدر ڈونلڈ ٹرمپ نے عہدہ سنبھالتے ہی کہا تھا کہ وہ خلیج میکسیکو کو خلیج امریکہ کا نام دیں گے۔
ٹرمپ نے اپنی حلف برداری کے دن ایک ایگزیکٹو آرڈر پر دستخط کیے تھے جس کے تحت محکمہ داخلہ کو 30 دن کے اندر وہ تمام مناسب اقدامات کرنے کی ہدایت دی گئی جو نام کی تبدیلی کے لیے ضروری ہوں۔
واضح رہے کہ گلف یا خلیج سمندر کے اس حصے کو کہتے ہیں جو 3 جانب سے خشکی سے گھرا ہو اور اس میں داخلے کا راستہ بھی ہو۔ عام طور پر خلیج میں داخلے کا راستہ تنگ ہوتا ہے۔
خلیج میکسیکو کو امریکہ کی ’تھرڈ کوسٹ‘ بھی کہا جاتا ہے کیوں کہ اس کی ساحلی پٹی امریکہ کی 5 ریاستوں ٹیکساس، لوئزیانا، مسیسپی، الاباما اور فلوریڈا سے ملتی ہے۔
امریکی صدر ڈونلڈ ٹرمپ نے کہا کہ دوسرے ملکوں کو امریکہ سے فائدہ نہیں اٹھانے دوں گا،،ایران سےجنگ کی بجائے جوہری معاہدے کو ترجیح دوں گا، اگر ہم معاہدہ کر لیتے ہیں تو اسرائیل ایران پر بمباری نہیں کرے گا، یہ نہیں بتا سکتا کہ ہم ایران کو کیا کہنے جا رہے ہیں، امیدہے ایران جو کرنے کا سوچ رہا ہے وہ نہیں کرے گا۔
