امریکہ کے صدر ڈونلڈ ٹرمپ نے روسی صدر ولادیمیر پوتن کو ’پاگل‘ قرار دیتے ہوئے خبردار کیا ہے کہ پورے یوکرین پر قبضے کی کوشش روس کو زوال کی طرف لے جائے گی۔
ڈونلڈ ٹرمپ نے اتوار کو اپنے سوشل میڈیا پلیٹ فارم ٹروتھ سوشل پر ایک پوسٹ میں لکھا کہ ’میرے پوتن کے ساتھ ہمیشہ سے خوشگوار تعلقات رہے ہیں، لیکن جانے ان کو کیا ہو گیا ہے اور مکمل طور پر پاگل ہو گئے ہیں۔‘
انہوں نے پچھلے تین روز کے دوران روس کے یوکرین پر ڈرون اور میزائل حملوں کی طرف اشارہ کرتے ہوئے کہا کہ ’پوتن بغیر کسی ضرورت کے بڑی تعداد میں لوگوں کو قتل کر رہے ہیں۔‘
ان کے مطابق ’میزائل اور ڈرون بغیر کسی وجہ سے یوکرین کے شہروں پر حملے کر رہے ہیں۔‘
ڈونلڈ ٹرمپ نے متنبہ کرتے ہوئے کہا کہ ’اگر پوتن یوکرین کو فتح کرنا چاہتے ہیں تو یہ چیز ان کو روس کے زوال کی طرف لے جائے گی۔‘
دوسری جانب امریکی صدر نے یوکرینی صدر ولادیمیر زیلنسکی کے حوالے سے بھی مایوسی کا اظہار کیا ہے۔
انہوں نے کہا کہ ’زیلنسکی جس طرح سے بات کرتے ہیں اس سے بھی ان کے ملک کا کوئی بھلا نہیں ہو رہا، ان کے منہ سے نکلنے والا ہر لفظ مسائل کا باعث بنتا ہے، مجھے یہ پسند نہیں، بہتر ہے کہ اس سلسلے کو روکا جائے۔‘
