امریکہ کے وزیرِ خارجہ مارکو روبیو نے کہا ہے کہ صدر ڈونلڈ ٹرمپ اور صدر پوٹن کے درمیان ممکنہ ملاقات کا دار و مدار اس بات پرہے کہ روس یوکرین جنگ کے خاتمے کے لیے کتنا سنجیدہ ہے۔
مارکو روبیو کے مطابق انہوں نے روسی ہم منصب سرگئی لاوروف سے منگل کو سعودی عرب میں ملاقات کے دوران بھی دونوں ملکوں کے صدور کی ملاقات کے بارے میں بات چیت کی تھی۔
امریکی وزیرِ خارجہ کے مطابق انہوں نے روسی عہدیداروں کو بتا دیا تھا کہ دونوں ملکوں کے صدور کے درمیان اُس وقت تک ملاقات نہیں ہو سکتی جب تک ہمیں یہ معلوم نہیں ہوجاتا کہ ملاقات کس بارے میں ہو گی۔
ایک انٹرویو میں مارکو روبیو نے کہا کہ ان کے خیال میں جب دونوں صدور کی ملاقات ہو گی تو اس میں اسی نقطے پر بات ہو گی کہ آیا یوکرین جنگ ختم کرنے کے لیے ہم کیا کر سکتے ہیں۔
امریکی وزیرِ خارجہ سے جب اس ضمن میں سوال کیا گیا تو ان کا کہنا تھا کہ صدر ٹرمپ کی روسی ہم منصب سے ملاقات کا وقت ان کے علم میں نہیں ہے۔
ان کے بقول صدر ٹرمپ جاننا چاہتے ہیں کہ روس یوکرین جنگ کے خاتمے میں سنجیدہ بھی ہے یا نہیں۔
امریکی وزیرِ خارجہ نے کہا کہ یوکرین جنگ کے خاتمے سے متعلق روس کو جانچنے کا طریقہ یہی ہے کہ اس کے ساتھ رابطہ رکھا جائے اور اس سے پوچھا جائے کہ وہ جنگ کے خاتمے میں کتنا سنجیدہ ہے۔ اگر وہ سنجیدہ ہے تو ماسکو سے اس کے مطالبات پوچھے جائیں۔
انہوں نے کہا کہ روس سے پوچھا جائے کہ جنگ کا خاتمہ عوامی مطالبہ، کوئی نجی مطالبہ یا کچھ اور ہے۔
امریکی وزیرِ خارجہ نے کہا کہ ہم نے روس سےجس واحد معاملے پر اتفاق کیا ہے وہ امن ہے۔ ماسکو اس ضمن میں کیا آفر کرتا ہے، وہ کیا ماننا چاہتا ہے اور وہ امن کے بارے میں سنجیدہ بھی ہے یا نہیں؟
ان کے بقول وہ فوری طور پر کسی نتیجے پر نہیں پہنچے ہیں۔
تاہم مارکو روبیو کا کہنا ہے کہ امریکہ نے یوکرین سمیت سب کے ساتھ رابطہ کیا تھا۔
واضح رہے کہ یوکرین کے معاملے پر امریکہ اور روس کے اعلیٰ عہدیداروں کے درمیان منگل کو سعودی عرب کے شہر ریاض میں ملاقات ہوئی تھی۔تاہم اس ملاقات میں یوکرین اور یورپی یونین سے کوئی بھی مدعو نہیں تھا۔
روس نے لگ بھگ تین برس قبل فروری 2022 میں یوکرین پر جارحانہ حملہ کیا تھا اور فریقین کے درمیان اب بھی لڑائی جاری ہے۔
