پاکستان کے صوبے سندھ کے شہر نوشہر و فیروز میں ٹرالر اور مسافر وین میں ٹکر ہونے سے 7 افراد ہلاک اور 15 زخمی ہوگئے۔
پولیس کے مطابق 7 لاشوں اور زخمیوں کو مقامی اسپتال میں منتقل کیا گیا جبکہ 8 زخمیوں کو تشویشناک حالت میں نوابشاہ منتقل کردیا گیا ہے۔
پولیس کا بتانا ہے کہ حادثے کا شکار وین شادی کی تقریب سے نوشہر و فیروز واپس آرہی تھی۔
ایک دوسرے واقعے میں موٹر وے ایم 14 پر فتح جنگ کے قریب مسافر بس کو پیش آنے والے حادثے کے نتیجے میں 11 افراد ہلاک ہوگئے۔
ترجمان موٹروے پولیس کے مطابق موٹر وے ایم 14 پر فتح جنگ کے قریب بس کو حادثہ پیش آیا جس کے نتیجے میں 22 افراد زخمی بھی ہوئے۔
ترجمان کے مطابق بس بہاولپور سے اسلام آباد جا رہی تھی کہ بس ڈرائیورکی لاپرواہی کی وجہ سے بس حادثے کا شکار ہو گئی۔
ریسکیو حکام کا بتانا ہے کہ جاں بحق افراد میں 6 خواتین اور 5 مرد شامل، جاں بحق افرادکاتعلق بہاولپور، وہاڑی، شرق پور، اسلام آباد سے تھا۔
موٹر وے پولیس کا مزید بتانا ہے کہ جاں بحق افراد کی لاشیں اور زخمیوں کو مختلف اسپتالوں میں منتقل کر دیا گیا ہے۔
