چین میں گدھوں کے گوشت کی بڑھتی ہوئی مانگ کے پیش نظر پاکستان پڑوسی ملک کو اس جانور کا گوشت اور کھالیں برآمد کرے گا۔
وفاقی وزارت برائے قومی تحفظ خوراک کے مطابق چین سے سالانہ دو لاکھ 16 ہزار گدھوں کی کھالوں اور گوشت کی ترسیل کے معاہدے ہوئے ہیں۔
وزارت خوراک کا کہنا تھا کہ چینی کمپنیاں مذبح خانے کراچی پورٹ کے قریب بنانے میں دلچسپی رکھتی ہیں۔
وزارت خوراک کے مطابق ایسا کرنا ہمارے لیے اپنی فوڈ سکیورٹی کی وجہ سے ممکن نہیں کیونکہ اگر شہر کے اندر مذبح خانے بنائے تو لوکل مارکیٹ میں بھی وہ گوشت پہنچ سکتا ہے اس لیے ایسی کسی درخواست کو منظور نہیں کر رہے۔ ہم کراچی سے باہر تجارتی پورٹ پر مذبح خانے بنانے کو ترجیح دیں گے۔‘
وزارت خوراک نے بتایا کہ ’چین کو کھال اور گوشت برآمد کرنے کے لیے گوادر میں مذبح خانوں کی تعمیر کی جا رہی ہے، جو سب سے زیادہ محفوظ رہیں گے کیونکہ وہاں سے لوکل مارکیٹ متاثر نہیں ہو گی۔‘
رواں برس ہونے والی سرکاری گنتی کے مطابق پاکستان میں گدھوں کی آبادی 52 لاکھ ہے۔
وزارت خوراک کے مطابق پاکستان چاہتا ہے کہ چینی کمپنیاں گدھوں کی فارمنگ کے لیے لوکل فارمز کے ساتھ معاہدے کریں اور انہیں تولیدی سہولیات بھی فراہم کریں تاکہ مقامی سطح پر روزگار بھی پیدا ہو۔
