امریکہ کے نو منتخب صدر ڈونلڈ ٹرمپ 20 جنوری کو اپنے عہدے کا حلف اٹھائیں، اس تقریب میں کون، کون شریک ہوگا اس حوالے سے ابتدائی تفصیلات سامنے آ گئیں۔
رپورٹ کے مطابق دنیا کے امیر ترین شخص ایلون مسک ڈونلڈ ٹرمپ کی دوسری مدت کی تقریب حلف برداری میں شرکت کریں گے۔
حلف برداری کی تقریب میں ایلون مسک کی نشست دیگر امیر ترین افراد بشمول ایمیزون کے مالک جیف بیزوس اور ’میٹا‘ کے چیف ایگزیکٹیو مارک زگر برگ کے ساتھ ہو گی۔
رپورٹ میں کہا گیا ہے کہ امریکہ میں صدراتی تقریبِ حلف برداری میں شرکت کے لیے غیر ملکی رہنماؤں کو دعوت دینے کی روایت نہیں، تاہم ڈونلڈ ٹرمپ نے متعدد عالمی رہنماؤں کو مدعو کیا ہے۔
ارجنٹائن کے صدر ہاویئر ملے کی بھی تقریب میں شرکت متوقع ہے، وہ نومبر میں ڈونلڈ ٹرمپ کی کامیابی کے بعد ملاقات کرنے والے پہلے غیر ملکی رہنما تھے۔
نو منتخب امریکی صدر ڈونلڈ ٹرمپ نے چینی صدر شی جن پنگ کو بھی تقریبِ میں شرکت کے لیے مدعو کیا ہے، تاہم وہ شرکت کے لیے اپنے ایک ایلچی کو بھیجیں گے۔
اٹلی کی وزیرِ اعظم جارجیا میلونی کو بھی دعوت نامہ بھیجا گیا ہے، لیکن انہوں نے واضح جواب نہیں دیا کہ آیا وہ شرکت کریں گی یا نہیں، ان کا کہنا ہے کہ یقین سے نہیں کہہ سکتیں کیونکہ نہیں پتا کہ مصروفیات انہیں تقریب میں شرکت کی اجازت دیں گی یا نہیں۔
رپورٹ کے مطابق صدر کی تقریبِ حلف برداری میں موجود تمام سابق امریکی صدور کی شرکت کی روایت بھی برقرار ہے، سبکدوش ہونے والے صدر جو بائیڈن اور خاتونِ اول جل بائیڈن بھی پیر کو ہونے والی تقریب میں شریک ہوں گے۔
تاہم 4 برس قبل بائیڈن کی تقریبِ حلف برداری میں ڈونلڈ ٹرمپ نے شرکت نہیں کی تھی، وہ اس بات پر مصر تھے کہ انہیں انتخابات میں شکست نہیں ہوئی۔
سابق صدور براک اوباما، جارج بش اور بل کلنٹن بھی ٹرمپ کی تقریبِ حلف برداری میں شریک ہوں گے، جارج بش کے ساتھ ان کی اہلیہ لارا بش اور بل کلنٹن اپنی اہلیہ ہیلری کلنٹن کے ساتھ تقریب میں موجود ہوں گے۔
تاہم، سابق صدر براک اوباما اور مشل اوباما کے دفتر سے جاری بیان میں کہا گیا ہے کہ مشل اوباما تقریبِ میں شریک نہیں ہوں گی۔