امریکہ کے نو منتخب صدر ڈونلڈ ٹرمپ نے ہمسایہ ملک کینیڈا کو پیشکش کرتے ہوئے کہا کہ امریکہ کی ریاست بن جائیں ٹیرف ختم اور ٹیکس کم ہوجائیں گے۔
ٹرمپ کی طرف سے یہ بیان کینیڈین وزیراعظم جسٹن ٹروڈو کے استعفیٰ دینے کے اعلان کے چند گھنٹوں بعد سامنے آیا ہے۔
ڈونلڈ ٹرمپ نے سماجی رابطے کے اپنے پلیٹ فارم ’ٹروتھ سوشل‘ پر پوسٹ کرتے ہوئے کہا کہ امریکہ اور کینیڈا مل جائیں تو کتنا عظیم ملک بن سکتے ہیں۔
انہوں نے کہا کہ اگر کینیڈا امریکہ کے ساتھ الحاق کا فیصلہ کرکے اس کی 51ویں ریاست بننے پر راضی ہوتا ہے تو اسے روسی اور چینی جہازوں کے خطرے کا بھی سامنا نہیں رہے گا۔
ٹرمپ نے دعویٰ کیا کہ کینیڈا میں بہت سارے لوگ یہ چاہتے ہیں کہ ان کا ملک امریکہ کی ریاست بنے۔
ان کا یہ بھی کہنا تھا کہ امریکہ کینیڈا کو سبسڈی دے کر مزید تجارتی خسارہ برداشت نہیں کرسکتا۔
امریکی نو منتخب صدر نے یہ بھی دعویٰ کیا کہ کینیڈا کے وزیراعظم جسٹن ٹروڈو کو اس بات کا اندازہ تھا اس لیےانہوں نے استعفیٰ دینے کا فیصلہ کیا۔
یاد رہے کہ ڈونلڈ ٹرمپ کے گزشتہ دور صدارت میں امریکہ کے کینیڈا کے ساتھ تعلقات مثالی نہیں تھے۔
