امریکی صدر ڈونلڈ ٹرمپ نے اعلان کیا ہے کہ وہ 50 لاکھ ڈالرز کا ایک ایسا ’گولڈ کارڈ‘ متعارف کرنا چاہتے ہیں جسے خرید کر امریکہ کی مستقل شہریت حاصل کی جاسکے گی۔
ان کا کہنا تھا کہ یہ ای بی۔5 ویزہ پروگرام کا متبادل ہوگا جس کے تحت ایسے افراد کو امریکی شہریت دی جاتی ہے جو امریکہ میں سرمایہ کاری کے خواہش مند ہوتے ہیں۔
رپورٹرز سے گفتگو کرتے ہوئے انہوں نے کہا کہ ہم گولڈ کارڈ بیچنے جارہے ہیں، ہم اس کی 5 ملین ڈالرز کی قیمت رکھیں گے۔
انہوں نے مزید کہا کہ یہ (کارڈ) آپ کو گرین کارڈ کی مراعات دینے کے ساتھ ساتھ شہریت حاصل کرنے کا ذریعہ بھی ہوگا، اس کارڈ کو خرید کر دولت مند لوگ ہمارے ملک کا رُخ کریں گے۔
امریکی صدر ڈونلڈ ٹرمپ نے کہا ہے کہ ہم کچھ اور کرنے جا رہے ہیں، جو بہت، بہت اچھا ہونے جا رہا ہے، ہم ’گولڈ کارڈ‘ فروخت کرنے جا رہے ہیں، آپ کے پاس گرین کارڈ ہے، یہ گولڈ کارڈ ہوگا۔
ٹرمپ نے کہا کہ ہم اس کارڈ کی قیمت تقریباً 5 ملین ڈالر (تقریباً ایک ارب 35 کروڑ روپے) لگانے جا رہے ہیں اور اس کارڈ کے حامل غیر ملکی افراد کو گرین کارڈ کی مراعات ملیں گی، اس کے علاوہ یہ امریکی شہریت کا ایک راستہ بننے جا رہا ہے۔
امریکی صدر نے کہا کہ مجھے لگتا ہے کہ کمپنیاں لوگوں کو لانے کے لیے ادائیگی کریں گی، مثال کے طور پر، آپ آج وارٹن اسکول آف فنانس یا ہارورڈ یا اسٹینفورڈ یا کسی بھی کالج سے فارغ التحصیل ہیں اور کوئی نہیں جانتا کہ آپ کسی کمپنی کے لیے کام کرنے جا سکتے ہیں یا نہیں۔
انہوں نے کہا کہ ایپل اور یہ تمام کمپنیاں جو چاہتی ہیں کہ ذہین لوگ ان کے لیے کام کریں، وہ ان لوگوں کے لیے ایک کارڈ خرید سکیں گی جو ٹاپ اسکولوں کی کلاس میں نمبر ون رہے ہیں، میں اس گولڈ کارڈ کو ان چیزوں میں سے ایک کے طور پر دیکھتا ہوں۔’
ان کا کہنا تھا کہ ’لہٰذا آپ کو بڑے ٹیکس دہندگان، بڑے روزگار پیدا کرنے والے مل رہے ہیں، اور ہم ان میں سے شاید 10 لاکھ کارڈ فروخت کرنے کے قابل ہوں گے، شاید اس سے بھی زیادہ بیچ سکیں، اور اگر آپ اعداد و شمار شامل کرتے ہیں تو وہ بہت اچھے ہیں۔‘
ڈونلڈ ٹرمپ نے مثال دی کہ ایک ملین کارڈز کی مالیت 5 کھرب ڈالر ہوگی، 5 کھرب، واہ! اور اگر آپ 10 ملین کارڈ فروخت کرتے ہیں تو، یہ فگر 50 کھرب ڈالر ہوگا، ہم پر 35 کھرب ڈالر کا قرض ہے، یہ اچھا ہوگا، تو ہم اسے دیکھیں گے۔
ایک صحافی نے سوال کیا کہ کیا روس کے امرا گولڈ کارڈز کے لیے اہل ہوں گے؟
ٹرمپ نے جواب دیا کہ ہاں شاید، میں کچھ روسی امرا کو جانتا ہوں جو بہت اچھے لوگ ہیں، یہ ممکن ہے۔
امریکی صدر نے کہا کہ امیگریشن پروگرام، جس کے بارے میں ان کا کہنا ہے کہ یہ قانونی ہے، تقریباً 2 ہفتوں میں شروع ہو سکتا ہے، یہ ممکن ہے کہ روسی اشرافیہ گولڈ کارڈ کے لیے اہل ہو۔
انہوں نے کہا کہ ’ای بی -5 پروگرام نے غیر ملکیوں کو امریکی کاروباروں میں سرمایہ کاری کرنے کا وعدہ کرتے ہوئے گرین کارڈ دیے، اس پروگرام کو ایک نام نہاد گولڈ کارڈ سے تبدیل کیا جائے گا جسے لوگ امریکی حکومت سے تقریباً 5 ملین ڈالر میں خرید سکیں گے۔‘
ڈونلڈ ٹرمپ نے کہا کہ اس اسکیم سے متعلق مزید تفصیلات آنے والے ہفتوں میں سامنے آئیں گی۔
واضح رہے کہ ای بی۔5 ویزہ پروگرام کے تحت بین الاقوامی سرمایہ کار امریکہ میں سرمایہ کاری اور ملازمتیں پیدا کرنے کا وعدہ کرکے امریکی شہریت حاصل کرسکتے ہیں۔ یہ اسکیم 1990 میں کانگریس نے منظور کروائی تھی۔
