امریکہ نے یمن میں حوثیوں کے خلاف اپنے فضائی حملوں میں اضافہ کر دیا ہے۔
اتوار اور پیر کی درمیانی شب امریکہ نے یمن کے پانچ مختلف صوبوں میں حوثی ٹھکانوں پر 29 فضائی حملے کیے۔
ذرائع کے مطابق ان حملوں میں الحدیدہ صوبے کی رأس عیسیٰ بندرگاہ اور کمران جزیرے کو بھی نشانہ بنایا گیا، جو الصلیف کے علاقے میں واقع ہیں۔
اسی طرح جنوبی صنعاء میں امریکی فضائی حملوں میں حوثی اہداف کو نشانہ بنایا گیا۔
ذرائع کے مطابق السواد کے فوجی کیمپ میں حوثیوں کے اسلحے کے گوداموں پر تین حملے کیے گئے۔ ان کے نتیجے میں دار الحکومت صنعاء زور دار دھماکوں سے لرز اٹھا۔
امریکی لڑاکا طیاروں نے صنعاء کے مغرب میں واقع بنی مطر ضلع میں حوثیوں کے ٹھکانوں پر چھ فضائی حملے کیے۔
حوثی ذرائع ابلاغ کے مطابق دارالحکومت صنعاء کی شارع الأربعین پر امریکی بم باری کے نتیجے میں 14 افراد زخمی ہوئے۔
ادھر، صعدہ شہر کے مشرقی علاقوں میں بھی امریکی طیاروں نے حوثی اہداف پر تین حملے کیے۔
واضح رہے کہ15 مارچ 2025 کے بعد سے امریکہ نے یمن میں حوثیوں کے خلاف تقریباً روزانہ کی بنیاد پر فضائی حملے شروع کیے۔
حوثیوں کا دعویٰ ہے کہ انہوں نے بحیرہ احمر میں امریکی طیارہ بردار بحری جہاز کو کئی بار نشانہ بنایا ہے۔
29 اپریل کو امریکی وزارت دفاع (پینٹاگان) نے اعلان کیا کہ امریکہ 15 مارچ سے اب تک یمن میں حوثیوں کے 1000 سے زیادہ اہداف کو نشانہ بنا چکا ہے۔
