اسرائیلی اور یمنی حکام نے بدھ کو بتایا ہے کہ اسرائیلی فضائی کارروائی میں یمن کے انٹرنیشنل ایئرپورٹ پر موجود آخری بچ جانے والا ہوائی جہاز بھی تباہ ہو گیا ہے۔
حوثیوں کے ٹی وی چینل المصیراہ نے ایکس پر ایک پوسٹ میں بتایا ہے کہ متعدد اسرائیلی حملوں میں صنعا ایئرپورٹ کے رن وے اور یمنیہ ایئر ویز کے طیارے کو نشانہ بنایا گیا ہے۔
ایکس پر صنعا ایئرپورٹ کے ڈائریکٹر خالد الشعیف نے ایک ویڈیو جاری کی ہے جس میں ایئرپورٹ پر کھڑے ہوائی جہاز میں سے گہرہ سیاہ دھواں اٹھتے دیکھا جا سکتا ہے۔ صنعا ایئرپورٹ کے ڈائریکٹر نے اپنی پوسٹ میں لکھا ہے کہ یہ یمنیہ کا آخری فعال ہوائی جہاز تھا۔
حوثی انتظامیہ کے مطابق صنعا ایئرپورٹ پر کمرشل سروسز کا آغاز 17 مئی کو دوبارہ شروع ہوا تھا۔ جبکہ اسے 11 روز قبل اسرائیل کے شدید حملوں میں چھ ہوائی جہازوں کے تباہ ہونے کے بعد بند کر دیا گیا تھا۔
اسرائیل کے وزیر دفاع کا کہنا ہے کہ حوثیوں کی جانب سے دو روز قبل اسرائیل پر دو میزائل داغنے کے بعد ایئرپورٹ پر حوثیوں کے ’ٹھکانوں‘ کو لڑاکا طیاروں نے نشانہ بنایا ہے۔
انہوں نے ایک بیان میں کہا ہے کہ ’فضائیہ کے طیاروں نے صنعا میں ایئرپورٹ پر حوثیوں کی دہشت گرد تنظیم کے ٹھکانوں کو نشانہ بنایا ہے اور آخری بچا طیارہ تباہ کر دیا ہے۔‘
دوسری جانب یمنیہ کے ایک بیان کے مطابق تباہ ہونے والے جہاز نے عازمین حج کو سعودی عرب لے کر جانا تھا۔
