جنوبی غزہ کے علاقے خان یونس میں اسرائیل کے فضائی حملوں میں قطری میڈیا الجزیرہ غزہ کے بیوروچیف زخمی جبکہ ان کا کیمرامین ہلاک ہوگیا ہے۔
خان یونس میں قائم فرحانا اسکول پر اسرائیل کی جانب سے میزائل حملے کیے گئے جہاں الجزیرہ کے بیورو چیف وائل الدحدوح اور کیمرامین سامر ابو دقہ صورت حال سے آگاہ کررہے تھے کہ اسی دوران میزائل آگرا جس کے نتیجے میں کیمرا مین اور بیورو چیف زخمی ہوگئے۔
حملہ صبح ساڑھے 6 بجے کیا گیا جب کہ اسرائیلی فورس کی جانب سے کلیئرنس ملنے کے بعد زخمیوں کیلئے ایمبولینس روانہ کی گئی لیکن بدقسمتی سے راستے میں ملبے کا ڈھیر پڑا ہونے کی وجہ سے ایمبولینس بروقت نہ پہنچ سکی جس سے کیمرامین ہلاک ہوگیا۔
بلڈوزر کی مدد سے ملبہ اٹھایا گیا اور پھر زخمی بیورو چیف سمیت شہید کیمرامین کو ناصر اسپتال منتقل کیا گیا۔
فلسطین کی وزارت داخلہ کا کہنا ہےکہ الجزیرہ کے صحافیوں کے علاوہ حملے میں فلسطین نیو پریس ایجنسی کا ایک صحافی اور سول ڈیفنس ٹیم کے 3 اہلکار بھی ہلاک ہوئے۔
واضح رہے کہ الجزیرہ غزہ کے بیورو چیف کا خاندان اکتوبر میں ہونے والے اسرائیلی فضائی حملے میں ہلاک وگیا تھا، ان کے خاندان میں اہلیہ، بیٹا، بیٹی اور ایک پوتا شامل تھے۔
7 اکتوبر سے اب تک غزہ میں اسرائیلی کارروائیوں کے نتیجے میں مرنے والے فلسطینیوں کی تعداد 18 ہزار 797 سے تجاوز کرگئی ہے جب کہ 50 ہزار سے زائد زخمی ہیں اور 7 ہزار 780 سے زائد افراد لاپتا ہو چکے ہیں۔
