اسرائیلی فورسز کی یمن میں بمباری، ڈبلیو ایچ او کے سربراہ بال بال بچ گئے

عالمی ادارہ صحت کے سربراہ ڈاکٹر تیدروس نے بتایا کہ اسرائیل کے فضائی حملے نے صنعاء ہوائی اڈے کو نشانہ بنایا تو اس وقت وہ اپنی ٹیم کے ہمراہ یمن سے روانہ ہونے والے تھے۔

ڈاکٹر تیدروس یمن میں اقوام متحدہ کے مغوی عملے کی رہائی کے لیے مذاکرات کرنے اور جنگ زدہ ملک کی صحت و انسانی صورتحال کا جائزہ لینے کے لیے موجود تھے۔

انہوں نے سوشل میڈیا پر دیے گئے اپنے بیان میں کہا کہ اسرائیلی فوج کے فضائی حملے میں “ہمارے طیارے کے عملے کا ایک کارکن زخمی ہوا ہے، جبکہ 2 افراد کی جانیں گئی ہیں۔

عالمی ادارہ صحت کے سربراہ نے کہا کہ حملے میں ایئرپورٹ کا رن وے، ایئر ٹریفک کنٹرول ٹاور اور ڈپارچر لاؤنج تباہ ہوگئے ہیں۔

انہوں نے کہا کہ وہ حملے کے وقت ڈپارچر لاؤنج سے چند میٹر فاصلے پر ہی موجود تھے تاہم وہ حملے میں محفوظ رہے۔

اسرائیلی طیاروں نے یمن کے دارالحکومت صنعا کے ایئرپورٹ اور حدیدہ شہر میں بندرگاہ، تیل اور بجلی کی تنصیبات کو نشانہ بنایا۔ کارروائی کے دوران صنعا ایئرپورٹ کو بھی شدید نقصان پہنچایا۔

حوثی عہدیدار کے مطابق حملوں کے دوران 3 افراد ہلاک اور 16 زخمی ہوئے ہیں۔