اسرائیل میں قطرکا ٹی وی چینل الجزیرہ بندکردیا گیا

اسرائیل میں قطری ٹی وی چینل الجزیرہ کی نشریات معطل کردی گئیں۔

اسرائیلی سیٹلائٹ سروس کے مطابق اسرائیلی حکومت کے فیصلے پر اسرائیل میں الجزیرہ کی نشریات روک دی گئی ہیں۔

اسرائیل کے وزیر اعظم بنیامین نتن یاہو نے سماجی رابطے کی ویب سائٹ ایکس پر لکھا کہ حکومت نے ’متفقہ طور پر فیصلہ کیا ہے کہ اسرائیل میں الجزیرہ چینل بند کر دیا جائے گا۔‘

اس سے قبل گذشتہ ماہ کے آغاز میں اسرائیلی پارلیمنٹ نے ایک قانون کی منظوری دی تھی جس کے تحت سینیئر وزرا سکیورٹی عوامل مدنظر رکھتے ہوئے غیر ملکی نیوز نیٹ ورکس کو بند کرنے کا اختیار رکھتے ہیں۔

غزہ میں اسرائیلی جارحیت کے دوران الجزیرہ چینل کے متعدد صحافی اور ان کے اہل خانہ اسرائیلی بمباری میں جان سے جا چکے ہیں۔