اسرائیلی افواج نے جنوبی غزہ میں ایک امریکی حمایت یافتہ امدادی مرکز پر جمع فلسطینیوں پر فائرنگ کر دی، جس کے نتیجے میں کم از کم 31 افراد ہلاک اور 120 زخمی ہو گئے۔
غزہ میں حکومت کے میڈیا دفتر نے ایک بیان میں کہا کہ اسرائیل نے رفح میں ایک امریکی حمایت یافتہ امدادی مرکز پر حملہ کرکے کم از کم 31 افراد کو ہلاک اور 115 کو زخمی کر دیا ہے۔
بیان میں کہا گیا ہے کہ ایسے امدادی مقامات پر پچھلے ایک ہفتے کے دوران حملوں میں کم از کم 39 افراد ہلاک ہوچکے ہیں، جب کہ زخمیوں کی تعداد 220 سے تجاوز کر گئی ہے۔
بیان میں کہا گیا ہے کہ یہ شہادتیں ’ان علاقوں کی حیثیت کو انسانی امداد کے مراکز کے بجائے ’موت کے جال‘ کے طور پر ظاہر کرتی ہیں۔
بیان میں مزید کہا گیا کہ ہم پوری دنیا کو تصدیق کے ساتھ بتاتے ہیں کہ جو کچھ ہو رہا ہے وہ امداد کا ایک منظم اور بدنیتی پر مبنی جنگی ہتھیار کے طور پر استعمال ہے، جس کا مقصد بھوکے شہریوں کو بلیک میل کرنا اور انہیں جان بوجھ کر ایسے کھلے مقامات پر اکٹھا کرنا ہے جہاں انہیں نشانہ بنایا جا سکے۔
یہ مقامات قابض فوج کے زیر انتظام اور نگرانی میں ہیں، اور ان کی مالی معاونت اور سیاسی سرپرستی قابض حکومت اور امریکی انتظامیہ کر رہے ہیں، جو ان جرائم کی مکمل اخلاقی اور قانونی ذمہ دار ہیں۔
